Prokuroria e Posaçme i ka dorëzuar INTERPOL-it mandat-arrestin ndërkombëtar për Sokol Xhruën, i cili rezulton se 2 javë para operacionit të zbulimit të bazave të armatimeve, është larguar drejt SHBA, shtet jetonte prej disa vitesh.
Ndërkohë, sipas burimeve, mësohet se arsenali i armëve i gjetur në qendrën artistike “Migjeni”, është dërguar në laboratorin e policisë shkencore në policinë e Shtetit, ku ekspertët janë duke kryer verifikime nëse këto armë janë përdorur në ngjarje të tjera kriminale apo jo.
Pra, Instituti i Policisë Shkencore që ndodhet në Ministrinë se Brendshme është kthyer në një “depo” armësh. Armët e sekuestruara disa ditë më parë po u bëhet ekspertim balistik dhe daktilografik. Armët janë të llojeve të ndryshme si: snajper, antitanke, kallashnikovë, pistoleta, silenciatorë, radio policie e ushtrie, optikë termikë për snajper, pjesë të të ndryshme për modifikimin e armëve luftarake e sasi municionesh luftarake.
Arsenali i armëve në ndërmarrjen artistike ‘Migjeni’ e cila ishte në pronësi Sokol Xhurës u gjet falë teknologjisë. Nëpërmjet aplikacionit ‘Google Maps’ bashkëpunëtori i drejtësisë, Enver Jamaku ndihmoi drejtësinë në gjetjen e depos së armëve në ish-ndërmarrjen artistike ‘Migjeni’.
