Analisti Ilir Kalemaj e cilëson si të pasinqertë ofertën e kryeministrit Edi Rama për liderin opozitar Lulzim Basha.
“Më duket ofertë e pasinqertë politike në formë provokimi, është një déjà vu i marrëveshjes të 2017. Është hera e tretë që i jep afatin e 24 orëve, për të demoralizuar votuesin e PD. Kjo teknikë funksionoi në 2017, dhe shkaktoi çarje në koalicionin opozitar, veçanërisht midis PD dhe PSI, që kanë krijuar një koalicion edhe pse me dy lista të ndryshme. E dëgjova me kujdes Ramën, dhe ai tha se oferta vlen vetëm në qoftë se fitojmë ne, pra kjo ka edhe një kleçke juridike, dhe kanë filluar konstitucionalistët të debatojnë se kush ka të drejtën e qeverisjes, partia e parë apo koalicioni. Natyrisht zgjidhja më e mirë do të ishte ajo teknike, që do të zbuste tonet”, tha Kalemaj.
Për sa i përket figurës së presidentit Meta, Kalemaj tha se “në qoftë se një danez do të shihte sjelljen e presidentit, do ta cilësonte si të papranueshme. Por ne nuk kemi ende një shtet të së drejtës, nuk jemi demokraci e konsoliduar, jemi larg në anëtarësimin”.
Sipas analistit të ftuar në emisionin “Absolut 4”, Shqipëria është “një republikë ekzekutive, një autokraci e personalizuar ku pushtetet janë të përqendruara dhe ekzekutivi është omnipotent, pa institucione të pavarura. Në këtë kontekst vjen edhe qëndrimi i presidentit”.
