5 autobusë me refugjatë janë drejtuar mëngjesin e sotëm drejt kufirit shqiptarë ku janë përqëndruar në Kampin e Filipiadhës, në periferi të Janinës.
Autoritetet greke njoftuan se zhvendosën katër autobusë me sirianë dhe një autobus më shtetas afganë Porti i Pireut drejt Janinës, qytetit kufitar me Shqipërinë. Kampi ndodhet 123 km nga kufiri shqiptar dhe në të, sipas autoriteteve greke, mund të strehohen deri në 700 refugjatë. Autoritete greke thanë se do të vijojnë zhvendosjen e grupeve të refugjatëve edhe në dy kampe të tjera të cilat janë përgatitur gjatë këtyre ditëve në Veri të Greqisë.
Njëri prej këtyre kampeve është në zonën e Pogonit, 25 km nga pika kufitare e Kakavijës me Shqipërinë. Në këtë strehë pritet të mbërrijnë rreth 200 refugjatë, aq sa është edhe kapaciteti i godinës, që ka shërbyer më parë si një konvikt nxënësish. Kampi i tretë po përgatitet në pistën e ish aeroportit ushtarak të Janinës. Autoritete greke zhvendosën një javë më parë 162 refugjatë sirianë nga Pireu në qytezën e Konicës, pranë kufirit me Shqipërinë. Refugjatët u thanë mediave shqiptare se synonin të kalonin drejt Gjermanisë dhe vendeve të tjera europiane. Autoritetet shqiptare janë shprehur kundër përdorimit të territorit të vendit si kalim transit, për sa kohë nuk ka një tjetër portë dalëse që do të lejonte udhëtimin e refugjatëve drejt shteteve të Europës Qëndrore, të cilat janë dhe destinacioni i synuar i tyre.
(Boldnews)
