Është zbardhur axhenda e plotë e Kongresit të Partisë Socialiste për ditën e nesërshme. Mësohet se në Kongres do të jetë i pranishëm dhe ish-kryeministri britanik Tony Blair. Ndërkohë, prezenca e ish-kreut të Partisë Socialiste, Fatos Nano do të jetë një pikë referimi për këtë kongres, nëse ai e pranon ftesën që PS i ka bërë atij për të qenë prezent. Një pikë shumë e rëndësishme që do të diskutohet dhe votohet janë ndryshimet statuore, të huazuara nga modeli laburist. Edi Rama, si përgjigje ndaj sfidës së drejtpërdrejtë të Blushit, do t’i propozojë Kongresit referendumin nëse duhet të ketë, apo jo, zgjedhje për postin e kryetarit.
Ja cila është axhenda e Kongresit të Partisaë Socialiste:
1- Fjala e kryetarit të Partisë Socialiste, Edi Rama;
2- Raporti mbi ecurinë dhe rezultatet e fushatës së anëtarësimeve e zgjedhjeve në PS, nga Gramoz Ruçi;
3- Raport i Komisionit të Garancive Statutore për veprimtarinë midis dy kongreseve
4- Pyetje dhe diskutime;
5- Ndryshime e përmirësime në Statutin e PS;
6- Zgjedhja e organeve drejtuese qendrore të PS.
Në këtë Kongres do të jenë të pranishëm figura të rëndësishëm të së majtës botërore si kreu i së majtës europiane në Parlamentin Europian, Gianni Pitella, si dhe Martin Shchultz dhe Massimo D’Alema. Gjithashtu mësohet se ftesa u janë shpërndarë edhe dy ish-presidentëve, Rexhep Meidani dhe Alfred Moisiu.
Ky kongres i Partisë Socialiste mblidhet në një kohë kur kjo forcë politike është përfshirë nga debate të forta brenda saj.
