Vllaznia dhe Skënderbeu janë dy skuadrat finaliste të Kupës së Shqipërisë për sezonin 2020/2021.
Shkodranët mundën në gjysmëfinale Laçin me rezultatin 1-0, ndërsa korçarët triumfuan 0-2 ndaj kryesuesve të Superligës, Teutës.
Në sfidën e luajtur në “Loro Boriçi” goli vendimtar i sfidës u shënua në minutën e 22-të të takimit. Pas një harkimi nga këndi nga ana e Da Silvës, Ardit Hoxhaj, godet saktë me kokë, duke kaluar në avantazh skuadrën e tij.
Ndërkohë në “Niko Dovana”, golat e fitores për korçarët u realizuan nga Meksi 2’ dhe Elvi Berisha 44’. Ky i fundit u ndëshkua me karton të kuq pasi festoi golin duke hequr fanellën. Futbollisti fierak, ishte ndëshkuar fillimisht me kartonin e verdhë në minutën e 12 pas një përplasje me Albani Aleksin në mesfushë.
Gjithsesi në pjesën e dytë, skuadra e Memellit arriti të ruante rezultatin, ndërsa tashmë do të diskutojë treofeun e Kupës së Shqipërisë kundër Vllaznisë.
https://streamable.com/zdc1i0
