Zbardhet dinamika e ngjarjes së ndodhur dje në qendër të Mamurrasit ku u plagosën me armë tre persona, mes tyre dy efektivë policia. Katër persona u arrestua, mes tyre nje efektiv policie i cili qëlloi me armë.
Ngjarja
Sipas SHÇBA, rreth orës 13:50, tre persona kanë goditur me sende të forta, një punonjës policie – David Madanin, i cili në kushtet e vetëmbrojtës ka nxjerrë armën e shërbimit dhe pasi i ka paralajmëruar ata, ka përdorur armën. Në fillim duke gjuajtur në ajër dhe pastaj nga goditja me sende të forta e shtetasve, ka kryer qitje të pakontrolluar duke plagosur Nikoll Fufin ose ndryshe Nikoll Vorfi dhe dy kolegët e tij, punonjësit e policisë Ilir Zekaj dhe Flamur Lleja. Të plagosurit janë jashtë rrezikut për jetën dhe ndodhen në spital për kurim të mëtejshëm.
Ngjarja ka ndodhur pasi punonjësit e policisë të Stacionit të Policisë Mamurras, në orët e paradites, kanë kryer kontroll në ambientet e një lokali në pronësi të shtetasit L.Fufi për aktivitet të paligjshëm në fushën e lojërave të fatit. Gjatë ushtrimit të detyrës, punonjësit e policisë kanë hasur në kundërshtimin e shtetasit Nikoll Vorfi (Fufi), i cili është shoqëruar në ambientet e Stacionit të Policisë Mamurras. Pas sqarimit të situatës, është lënë i lirë.
Rreth orës 13:50, kur punonjësit e policisë kishin ndërruar turnet e shërbimit, tre persona i kanë dalë përpara punonjësve të policisë me qëllim goditjen me mjete të forta. Ndodhur para këtij fakti, punonjësi i policisë David Madani ka qëlluar me armë duke plagosur shtetasit e sipërpërmendur.
Arrestimet
SHÇBA nën drejtimin e Prokurorisë së Rrethit Gjyqësor Kurbin ka kryer veprimet hetimore dhe dje arrestoi:
– Gjon Fufi, 40 vjeç, lindur e banues në Mamurras;
– Nikoll Fufi ose ndryshe Nikoll Vorfi, 36 vjeç, lindur e banues në Mamurras;
– Rudolf Fufi, 31 vjeç, lindur e banues në Mamurras.
Arrestimi i këtyre shtetasve u bë për veprat penale “Goditje për shkak të detyrës” dhe “Kanosje për shkak të detyrës” në bashkëpunim.
Nga grupi i posaçëm hetimor u sekuestruan si provë materiale 3 gëzhoja nga arma e zjarrit në posedim të punonjësit të policisë D.M. si dhe automjeti tip “Porsche Cayen” me të cilin udhëtonin autorët e dyshuar të ngjarjes.
Gjithashtu nga tërësia e veprimeve hetimore dhe pasojat e ardhura nga përdorimi i armës së zjarrit, u bë arrestimi në flagrancë i punonjësit të policisë Inspektor David Madani, 45 vjeç, me detyrë trupë shërbimi pranë Stacionit të Policisë Mamurras, për veprat penale “Plagosje e rëndë në kapërcim të kufijve të mbrojtjes së nevojshme” dhe “Plagosje e rëndë nga pakujdesia”.
