Takimi i javës në “Për’puthen 40+” mes Linditës dhe Naunit nuk shkoi aspak ashtu siç pritej. Në një moment gjithçka degradoi në ofendime personale nga ana e Naunit.
Ky takim që nuk u prit aspak mirë as nga konkurrentet e tjera të “Për’puthen 40+”, u komentua ditën e sotme në emisionin “Shqipëria Live” në Top Channel, ku Lindita dha edhe disa detaje të tjera nga kjo ngjarje.
Teksa tregon se nuk ndihet mirë pas asaj që ndodhi, Lindita shton: “Atë që më ndodhi mua nuk ia uroj asnjë femre. Nëse e zgjodha, e zgjodha për t’i dhënë një mundësi më shumë vetes dhe atij, pasi takimi katër minutësh nuk ishte i mjaftueshëm”.
Ajo më pas ka vijuar duke thënë se Nauni nuk ka ofenduar vetëm atë, por dhe produksionin dhe pronarin e lokalit, ku zhvilluan takimin.
“Ai po shante dhe produksionin, i thashë çfarë është kjo sjellje arrogante. Çunat pastaj ikën të ndajnë pronarin nga Nauni”, tha Lindita.
Kjo e fundit shtoi se pa nisur xhirimet, Nauni nisi me sjelljen arrogante që asaj nuk i pëlqeu aspak.
“Unë kam vazhduar takimin për respekt të produksionit. Unë kërkoj përjashtimin e tij. Është turp që mosha jonë të gabojë. Çdo fjalë e imja është e faktuar. Ai edhe në studio vijoi me fjalët. Në asnjë mënyrë nuk do dilja më në takim me Naumin. Nëse nuk do të isha unë, do të ishte dikush tjetër në vendin tim. Nuk rashë në nivelin e Naumit”, tha Lindita.
