Kryetari i PAA-së, Agron Duka, ka zhvilluar një takim me Përfaqësuesit e OSCE/ODHIR në Shqipëri, William Romans, dhe Adela Danaj.
Në fokus të diskutimeve ishte Kodi Zgjedhor dhe zhvillimi i zgjedhjeve të lira dhe të ndershme.
Gjatë takimit, kreu i PAA-së, i cili kandidon si pjesë e listës së koalicionit PD-AN në Qarkun e Durrësit, u shpreh se ndryshimet në Kod ngushtuan hapësirat për konkurrim dhe rritje të alternativave të reja politike dhe partive të vogla në vend.
“Ndryshimet në Kod rritën dhe thelluan defiçitin demokratik pasi ruajta e pahapur e listave të deputetëve për votuesit nuk është 30% por 60% e deputetëve të ardhshëm. Kjo cënon edhe cilësinë e deputetëve në parlamentin e ri.
Është rritur risku për keq-përdorimin e strukturave dhe fondeve publike nga mazhoranca në funksion të deformimit të vullnetit të zgjedhjeve.
Heqja e logove të partive politike dhe emrave të kandidatëve nga fleta e votimit rrit ndjeshëm riskun e votave të pavlefshme e cila mund të deformojë vullnetin e zgjedhësve”, tha Duka.
Sipas tij, PAA humbi të drejtën ligjore për konkurrimin e saj si forcë politike në të gjithë vendin”.
Në vijim, Duka tha se partitë politike janë një subjekt politik në garë dhe kandidatët për deputet janë një subjekt tjetër.
“Votuesit duhet të kishin lirinë e plotë për të zgjedhur të dyja bashkë ose secilën prej tyre veç e veç sipas preferencave dhe pritshmërive të tyre, në të gjithë vendin”, u shpreh ai.
Duka pyetjes së përfaqësuesit të OSBE/ODHIR: “Përse PAA nuk kandidoi e vetme kur keni parashikime optimiste për PAA?”, iu përgjigj; “PAA ka një mision ndaj shqiptarëve, rotacionin politik dhe nuk duhet të dëmtonte asnjë votë pro koalicionitdhe e dyta: PAA jashtë koalicionit nuk ka asnjë siguri për numrin e votave pasi Shqipëria vuan nga vjedhja e votave dhe politikanët hajdutë të votave janë akoma të padënuar.”.
Duka qartësoi se PAA ndryshe nga shumë parti të vogla është parti me mision dhe program të qartë, pro zhvillimit të qëndrueshëm rural dhe pro ekonomisë së Gjelbër. Romans theksoi se OSBE/ODHIR do të angazhojë vëzhgues dhe do të ndjekin nga afër gjithë proçesin përpara dhe gjatë ditës së votimeve.
