Organizata Botërore e Shëndetësisë bën sërish thirrje për shpërndarje të barabartë të vaksinave anti-covid.
OBSH kërkon më shumë investime në prodhimin e dozave, testeve të shpejta dhe terapive që luftojnë koronavirusin.
Organizata Botërore e Shëndetësisë sqaroi edhe njëherë qëndrimin lidhur me përdorimin e pasaportave të vaksinave, si zgjidhje për rikthimin e industrisë së turizmit global dhe tregtisë. Drejtori ekzekutiv i programit të emergjencave në OBSH, Michael Ryan, tha se “certifikatat e imunitetit” nuk duhet të përdoren për të shkuar në punë, shkollë apo për udhëtime ndërkombëtare. Sipas tij, kjo nxit diskriminim, pasi jo të gjithë kanë mundësi të vaksinohen.
Po ashtu Tedros Adhanom Ghebreyesus, bëri të ditur se 190 shtete të botës kanë nisur programet e vaksinimit deri më tani.
“Duhet të investojmë në prodhimin dhe qasjen e barabartë në testet e shpejta për Covid-19, trajtimet me oksigjen dhe vaksina, mes dhe brenda shteteve”, u shpreh Tedros Adhanom Ghebreyesus.
Drejtuesi i lartë i OBSH-së tha se rritja e prodhimit të vaksinave dhe shpërndarja e barabartë e tyre mbesin metodat më efikase në luftimin e përhapjes së pandemisë.
Gjithashtu, ai kritikoi disa vende të botës që nuk kanë vaksinuar ende punonjësit e shëndetësisë dhe grupet e rrezikuara.
Ghebreyesus përsëriti thirrjen e tij për shtetet e pasura që të ndajnë me vendet tjera, me të ardhura të mesme apo që konsiderohen të varfëra, dozat dhe metodat e tjera të trajtimit të pacientëve me Covid-19.
