Gjykata e Apelit në Tiranë ka lënë në qeli Skënder Vathin, i akuzuar si organizator i vrasjes së Behar Sofisë.
Ai kërkoi nga Apeli ndryshim të masës së sigurisë nga arrest në burg në masë më të butë, por Apeli ia rrëzoi kërkesën. Vathi nuk e pranoi në asnjë moment akuzën e ngritur nga prokuroria. Ndërkohë, tre të dyshuarit e tjerë Leonard Xhixha, Xhuliano Visha dhe Ernejt Shyti nuk kanë bëre ankim të masë së sigurisë.
24 vjeçari Shyti ka rrëfyer para grupit të hetimit se si ka ndodhur vrasja e Sofisë në 25 shkurt.
Nga raportimet, që i referohen burimeve nga prokuroria e Tiranës, lidhur me këtë ngjarje nuk ka persona të tjerë të shpallur në kërkim. Ndërsa, ende nuk është vendosur nëse dosja do të kalojë për hetime të mëtejshme në SPAK.
Kujtojmë se Behar Sofia u ekzekutua në 25 shkurt në anë të Lanës në Tiranë. Ngjarja ndodhi në orët e para të mëngjesit duke u parë nga një numër i madh kalimtarësh në zonë. Pas kapjes së organizatorëve, policia është në kërkim të porositësve të vrasjes së Behar Sofisë, i cili ishte arrestuar dhe hetuar më herët për parë të lëndëve narkotike.
