Kryeministri Edi Rama vijon batutat dhe akuzat ndaj opozitës. Ndërsa nuk ka një program dhe një bilanc pozitiv megjithëse ka kaluar dy mandate si Kryeministër dhe kërkon një të 3-të, Rama e ka përqëndruar fushatën pikërisht te akuzat, batutat dhe bullizmi i kundërshtarit politik.
Kreun e Partisë Demokratike, Lulzim Basha, Rama e cilëson jo vetëm si një politikan që përdoret politikisht, por edhe si “gjumash”.
Të njëjtën reagim ka bërë edhe ditën e sotme nëpërmjet një statusi në rrjetin social “Facebook”, por këtë herë ka zgjedhur një foto në të cilën shihet një qen i shtrirë në gjumë, dhe në të njëjtin ambient janë varur postera të sloganit të PD “Shqipëria Fiton”.
Këtë fotografi kryeministri Rama e shoqëron edhe me një shprehje: “Gjumi është ngjitës”.
Në anën tjetër, Lulzim Basha është takuar me banorë të “Unazës së Re”, ku edhe u shpreh se ndryshimi për shqiptarët do të vijë me 25 prill dhe se sipas tij kryeministri Edi Rama në këto 8 vite nuk i ka mbështetur qytetarët, por vetëm i ka sulmuar shqiptarët dhe Partinë Demokratike.
Basha gjithashtu deklaroi se e vetmja gjë me të cilën Rama po bë fushatë është vaksina dhe akuzat ndaj tij.
Kujtojmë se më herët lideri i opozitës Lulzim Basha ka sqaruar se nuk i është përgjigjur dhe nuk do t’i përgjigjet sharjeve dhe akuzave të kryeministrit, me të njëjtën gjuhë sepse qytetarët tashmë janë lodhur nga akuzat dhe sharjet e politikanëve me njëri-tjetrin.
