Spanja u bë kombëtarja e parë në histori që shënoi në 37 kualifikuese radhazi të Botërorit, duke thyer rekordin e mbajtur nga Gjermania me 36 ndeshje radhazi (1934-1985). Por, kjo është një statistikë që nuk do ta dëgjojë shumë Luis Enrike pas fitores së vuajtur kundër Gjeorgjisë në Tbilisi.
“Ishte një ndeshje për infarkt. Duke parë atë që po ndodhte në pjesën e parë, humbëm besimin. Ndërrimet i dhanë një impuls të ri lojës tonë”, deklaroi trajneri i Spanjës, i cili parashikon një tjetër ndeshje të vështirë edhe kundër Kosovës. “Do të jetë i njëjti film edhe ndaj Kosovës.
Kur një skuadër qëndron e mbyllur në mbrojtje, shkakton situata të tilla. Ne nuk ishim të kthjellët si zakonisht dhe ju e patë. Kishim ndryshuar shtatë lojtarë, gjë që nuk është shumë e zakonshme. Megjithatë, në fund morëm shpërblimin e merituar për përpjekjet tona. Na duhej për të na rritur moralin. Ramos është në rregull, por çfarëdo vendimi që unë do të marr, ai do të prodhojë debat”.
