Tani ai është personazh publik dhe mediat nuk reshtin ta intervistojnë. Plot pyetje i ka bërë, por kurrë nuk ua priste mendja në këtë rrëfim shokues: Një mik familjeje më përdhunoi kur isha djalë ende i vogël, 13 vjeç.
Kompozitori dhe muzikant i talentuar, Spyros Grammenos bëri dëshminë tronditëse teksa foli për The Press Project dhe zbuloi abuzimin seksual që pësoi në moshën 13 vjeç nga një mik i familjes.
Me forcën e shpirtit dhe guximin e ardhur plot ngurrim, Spyros Grammenos rrëfeu atë që ndodhi gati 30 vjet më parë.
“Po ndiej nevojën për të treguar një histori personale. Kam gjetur forcën pas 30 vjetësh për të folur për atë që më ndodhi, sepse vetëm para pak ditësh gjeta forcë t’ia tregoj mamasë sime. E tani po e them edhe publikisht. Unë kam rënë viktimë e një përdhunimi, kur isha 13 vjeç. Mbaj mirë mend kur ai njeri, në mënyrë të rafinuar arriti të më shpjerë në shtrat duke përdorur metoda në dukje të bukura. Por kur befas hipi sipër meje, kuptova se njeriu që hynte e dilte si i shtëpisë në familjen tonë, donte të abuzonte me mua. Menjëherë u përpoqa të largohem, të çlirohem prej tij. Por nuk ishte e mundur.
Ditët më pas, isha plotësisht i mpirë dhe nuk doja ta besoja se kishte ndodhur. E nuk mjaftoi kjo, ai disa herë më vonë kërkoi që të shkoja në shtëpinë e tij.
Kur ndodhi e gjitha kjo, ishte hera e dytë që shkoja në banesën e tij. Herën e parë që shkova atje, ai vuri në tv një kasetë seksi, më dha një cigare dhe më tha që të masturbohem. Kaq.
Shkova për herë të dytë dhe ndodhi ajo që ndodhi. Pas asaj që ndodhi, kam fajësuar gjithnjë veten time. “Pse shkova përsëri?”. Ndaj fajësova veten për këtë.
Kur mbusha 35 vjeç, pra 6 vjet më parë, fola me psikologun tim për herë të parë në lidhje me këtë temë.
I rrëfeva gjithë çfarë ndodhi në verën e vitit 1993, plot 28 vjet më parë. Fatkeqësisht kanë kaluar shumë vite dhe ligjërisht unë nuk mund ta ndjek penalisht.
Por ky njeri jeton dhe ka një jetë normale. Ai mund të vazhdojë ta bëjë këtë dhe unë nuk mund ta denoncoj askund. E pashë këtë verë dhe e përshëndeta me vështirësi. Ajo që tani dua, është drejtësi, kjo është ajo që unë kërkoj. Nga ana tjetër, shpresoj që askush tjetër të mos jetë lënduar” rrëfeu Spyros Grammenos duke theksuar se vazhdon edhe sot të përjetojë makthe.
