Menaxhimi i pandemisë dhe rimëkëmbja ekonomike u përmendën si sfidat kryesore të ekzekutivit të ri, nga kryeministri i sapo zgjedhur në Kosovë, Albin Kurti. Në mbledhjen e parë, ceremoniale të kabinetit të tij, Kurti tha se duhet të veprohej shpejt për të ulur rastet e infektimeve, për të eliminuar vdekjet e për të ndalur recesionin ekonomik.
Edhe në fjalën e mbajtur në Kuvend, pas votimit të qeverisë me 67 vota pro e 30 kundër ditën e hënë, Kurti vlerësoi se pandemia mbetej sfida kryesore, ndërsa Kosova është i vetmi vend i Ballkanit Perëndimor që nuk ka nisur fushatën e vaksinimit, kryeministri i ri parashtroi synimin për të vaksinuar 60 përqind të popullsisë deri në fund të vitit. Mes prioriteteve të tjera u listuan reformat në arsim, punësimi e vetingu në drejtësi.
Sa i përket dialogut me Serbinë, Kurti tha se do të punojë për zgjidhjen e problemeve ekzistuese, të tilla si çështja e personave të pagjetur, dhe siguroi se pa njohjen e pavarësisë nuk do të ketë pajtim.
Qeverinë e re, Kurti e formoi me partitë e komuniteteve jo serbe, pa përfshirjen e Listës Serbe. Ekzekutiv përbëhet nga 3 zëvendëskryeministra dhe 15 ministra, pesë prej të cilave do të jenë gra.
Kurti mori zyrtarisht detyrën në një ceremoni të zhvilluar pranë godinës së qeverisë, ku siç e kërkon tradita, paraardhësi Avdullah Hoti i dorëzoi postin.
