Kryetari i PD -së, Lulzim Basha ka mbledhur sot krerët e partisë në rrethe për diskutimin e vendimeve që do të merren për aksionin e ri politik të PD, programin, ekipin dhe përfaqësimin e demokratëve para shqiptarëve.
Gjatë fjalës së tij në mbledhje, Basha akuzoi qeverinë për gjendjen e mjerë ku po e zhyt përditë vendin dhe kryeministrin Rama, si të dalë jashtë realietit, një person që tashmë lufton vetëm për luksin dhe famën e vet.
“Ne kemi detyrën tonë, arsyeja pse ekzistojmë si parti, t’u gjendemi pranë njerëzve, me ndihmë për qytetarët dhe në një raport të pastër me të vërtetën për qytetarët, mund, duhet edhe do ta bëjmë edhe më mirë. Ju kërkoj juve, regjistrim konkret të të papunëve, të pastrehëve, familjeve me të ardhura minimale, të të goditurve nga përmbytjet, nga sëmundjet, prishjet e paligjshme të objekteve për të mundësuar kjo këtë buxhet që ka sjellë ky, por që buxheti ynë t’i përgjigjet realisht nevojave, se buxheti im dhe i PD nuk shkon për palma e fasada, por te njerëzit në nevojë. Asnjë familje nuk do mbetet pa bukë, ujë e drita”- tha Basha, duke shtuar se mbledhja e statistikave duhet të bëhet para 15 janarit.
Sipas Bashës, mediat dhe politikanët e Evropës po flasin hapur dhe pa dorashka.
“Ky realitet që shqiptarët e përjetojnë përditë tashmë po vë në rrezik integrimin e vendit në BE. Vetëm një njeri në botë nuk e sheh vend që të reflektojë për gjendjen ku është zhytur vendi, për mesazhet e forta ka zgjedhur të vazhdojë avazin, trushplarjes dhe keqinformimin e shqiptarëve me regji qendrore. Edhe kur del jashtë zyrës, merr me vete karriget e luksit të Tiranës, e merr me vete, me regji qendrore. Ashtu si sot në Peqin, me atë zonjën që nuk gjen punë, i trajton hallet si ankesa dembelësh. Droga po mbyt vendin dhe kjo ndodh në bashkëpunim e policinë dhe qeveritarët, ky thotë fajin e ka opozita”- tha Basha
