Mjekja shqiptare në Gjermani, Aurora Dollenberg, gjatë një interviste televizive është shprehur se vaksinimi antikovid në Shqipëri duhet të vijojë në mënyrë sistematike që imunizimi i tufës të jetë arritur në verë.
Ajo njoftoi se ka rifilluar në Gjermani vaksinimi me “Astra Zeneca”, ndërkohë që janë përfshirë dhe moshat mbi 65 vjeç, pas vendimit të EMA-s.
“Kufiri moshor që ishte vendosur për AstraZeneca që të mos përdoren mbi mosha 65 vjeç e sipër është hequr pasi sipas statistikave dhe ato pak raste që kanë pësuar trombozë nuk kanë lidhje me moshën mbi 65 vjeç, pasi ato pak raste të trombozave janë me një kufi moshor të shpërndarë”, informoi ajo.
“AstraZeneca jepet mbi moshat 18 vjeç e sipër, si kufiri i vetëm moshor që është vendosur për të në Gjermani. “Vaksinimi me AstraZeneca do të vazhdojë pasi vijon të mbetet efikase. Kjo është një vaksinë e dobishme dhe do të vijojë, megjithatë monitorojmë efektet anësore edhe një javë pas marrjes së saj. Nuk ka pasur një rritje domethënëse të rrezikut për tromboza dhe i vetmi kriter është se po jepet mbi 18 vjeç“, tha Dollenberg.
“Sikundër të gjitha vendet e tjera europiane, Shqipëria nuk është duke ecur shpejt. Gjithsesi mbetet optimizmi se po vijoi ky procesi në mënyrë sistematike, është shpresa e mirë që deri verën e këtij viti, ku jeta duhet të marrë gjallëri më të madhe, të ketë arritur imunizimi i pjesshëm i tufës.
