Humbja ndaj Bevenentos dhe distanca prej 10 pikësh me kryesuesit e Seria A ka lëkundur jo pak pozitat e Andrea Pirlos në pankinën e Juventusit. Lajmi konfirmohet dhe nga gazeta pranë klubit torinez “Tuttosport”, që në artikullin e saj shkruan se një humbje nuk mund të ndryshojë fatin e një trajneri, por kjo mund të jetë shkas për nisjen e prishjes së kontratës mes palëve.
Drejtuesit e lartë të klubit torinez kanë pasur një takim me Pirlon, të cilit i kanë dhënë ultimatum fitimin e të paktën një titulli në fund të sezonit.
Klubi pret një ndryshim të mentalitetit në 12 ndeshjet e ardhshme, 11 në kampionat plus finalja e Kupës së Italisë, përndryshe do të kishte një divorc të palëve. Për këtë, presidenti Andrea Anjeli ka nisur nga puna për të gjetur pasuesin e 41-vjeçarit. Në listën e dëshirave gjendet ish-tekniku i torinezëve, Massimiliano Allegri.
Por, çështja e trajnerit nuk është e vetmja që po diskutohet në shtëpinë e Juventusit. Nënkryetari i klubit, Pavel Nedved po mendon që të largojë dhe drejtorin sportiv, Paratici, të cilit i skadon kontrata në fund të sezonit. Nëse kjo ndodh, te Juventus do ndodhte një revolucion i vërtetë.
