Nga BoldNews.al
Një tender me vlerë rreth 130 milionë lekë të vjetra për rikonstruksion e tre zyrave të ish-presidentëve të Republikës, krijon përshtypjen se ish-krerët e Shtetit kanë jetuar në xhungël, në vende të ngjashme me skemat e filmit të famshëm hollivudian, “Jurasic Park”.
Drejtoria e Shërbimeve Qeveritare ka vendosur të rikonstruktojë zyrat, të cilat gjenden në katin e katërt dhe të pestë të një godine në bulevardin “Zogu I”, në Tiranë.
Por, në dokumentat e tenderit, të shpallur në 19 Mars 2021, janë parashikuar punime, të cilat janë tërësisht absurde dhe nuk lidhen aspak me realitetin, duke krijuar dyshime se ky investim është bërë vetëm “në letra”.
Në projektin e hartuar nga një studio private, e cila ka përfituar 2 milionë lekë për të kryer analizimin e gjendjes së zyrave, flitet për prerje pemësh mbi 10 metra, për heqje shkurresh, për përdorim eskavatorësh e prishje gardhesh.
“Duhet mbajtur parasysh se gjatë punimeve të pastrimit të mos dëmtohen ato pemë, të cilat nuk pengojnë në rehabilitimin ose ndërtimin e objektit të ri. Në rastet kur heqja e tyre është e domosdoshme, duhet të merren masa mbrojtëse që gjatë rrëzimit të tyre të mos ketë dëmtime në njerëz”, thuhet në dokumentin për rikonstruksionin e zyrave të tre ish-presidentëve.
Më tej vijohet: “Për pemët që janë më të larta se 10 metra, duhet që prerja e tyre të bëhet me pjesë nga 10 metra”.
Po ashtu, hartuesi i projektit parashikon edhe kujdesin që duhet treguar për muret rrethuese dhe ndërtime të tjera pranë objektit. (Kliko Këtu për specifikimet teknike)
Asnjë nga këto parashikime nuk ka lidhje me rikonstruksionin e zyrave, pasi ambjentet gjenden në një godinë pallat dhe që nuk rrethohen as me mure e gardhe e aq më tepër, me pemë të larta mbi 10 metra.
Duket qartësisht se bëhet fjalë për një material të marrë “copy-paste” nga ndonjë projekt tjetër dhe që është vendosur në dokumentat e tenderit për të justifikuar shpenzimin rreth 130 milionë lekë.
Dokumentat e tenderit kanë edhe të dhëna më konkrete mbi zyrat, shoqëruar me fotot përkatëse që justifikojnë ndërhyrjen.
Por, këto foto tregojnë një situatë, e cila, më së paku dëshmon se aty nuk ka jetuar njeri për një kohë të gjatë dhe, pse jo, edhe ofenduese për tre ish-presidentë të Republikës.
“Në fillim të kontratës, kontraktori duhet të heqë nga territori i punimeve të gjitha materialet organike vegjetare e ndërtuese dhe t’i djegë të gjithë pirgjet e mbeturinave të tjera”, thuhet në dokumentet e tenderit.
Është e paqartë se çfarë nënkuptohet me “mbetje organike vegjetare” në zyrat e caktuara për tre ish-presidentë, të cilët duhen pastruar gjatë rikonstruksionit të tyre.
Dallohet hapur se objekti i tenderit dhe dokumentat shoqëruese nuk përputhen aspak me njëri-tjetrin, duke dëshmuar se gjithë procedura është kryer me ngutje të madhe.
Por, Drejtoria e Shërbimeve Qeveritare nuk ka bërë asgjë për të ndryshuar këto “lapsuse”, duke krijuar përshtypjen se ato janë të qëllimshme, të shoqëruara edhe me dyshime mbi destinacionin real të fondit rreth 130 milionë lekë për tenderin e rikonstruksionit të tre zyrave të ish-presidentëve.
Tenderi pritet të mbyllet në 19 Prill 2021.
