Lideri i opozitës, Lulzim Basha ka folur me nota pozitive për një bashkëpunim mes koalicionit qeverisës dhe atij opozitar për të përmbushur detyrimin për hapjen e negociatave me BE-në.
Reagimi i kreut të PD-së ku flitet për të punuar bashkë, vjen pas deklaratave të deputetit gjerman, Gunther Krichbaum se Bundestagu nuk do të votojë pro hapjes së negociatave para tetorit të vitit 2018.
Reagimi i Bashës
Qëndrimi i Bundestagut gjerman kundër hapjes së negociatave me Shqipërinë është një lajm i keq për të gjithë ne. Lajmi i mirë është se Gjermania mbështet anëtarësimin e Shqipërisë në BE, sikurse u ripohua sot.
Tani është koha të punojmë për të realizuar reformat e nevojshme dhe marrë vendimet e duhura që u shërbejnë shqiptarëve dhe jo për t’u hedhur hi syve qytetarëve dhe partnerëve tanë.
Sot është koha për reflektim. Është koha që të gjithë ne që duam ndryshimin e vërtetë të bëhemi bashkë për të luftuar korrupsionin, krimin, drogën dhe për të garantuar zgjedhje të lira dhe të ndershme.
