Këshilli i Lartë Gjyqësor shkarkon nga detyra gjyqtaren e Krujës, Enkeleda Hoxha.
Vendimi u njoftua këtë të Mërkurë nga kryetarja e KLGJ, Naureda Llagami, duke i dhënë fund procesit disiplinor që nisi pas kërkesës së ILD për shkakrimin e gjyqtares.
Sipas raportit hetimor të ILD, gjyqtarja e Krujës ka dhënë 6 vendime në harkun kohor të maj 2017 – nëntor 2019 që përbëjnë akte që diskreditojnë figurën e gjyqtarit.
Në seancën e paraqitjes së përfundimeve mbi hetimin e kryer, Inspektori i Lartë i Drejtësisë Artur Metani kishte argumentuar shkeljet disiplinore të magjistrates, si mospërmbushje e pajustifikuar e funksioneve gjatë gjykimit, veprime që kanë sjellë përfitim të padrejtë për palët, mosrespektim të rëndë e të vazhduar të legjislacionit material e procedural penal dhe nxjerrje të akteve (vendimeve) të paarsyetuara. Nga ana tjetër, mbrojtja e gjyqtares kërkoi mos shkarkimin e saj.
Aktualisht, Enkelda Hoxha ndodhet nën masën e arrestit me burg, pas arrestimit për korrupsion.
Enkelda Hoxha është magjistratja e dytë për të cilën KLGJ ka pranuar kërkesën e Inspektorit të Lartë të Drejtësisë për shkarkim nga detyra, për shkelje të rënda disiplinore lidhur me lirimet para kohe me kusht dhe e treta magjistrate e shkarkuar nga KLGJ pas një hetimi disiplinor të ILD-së.
Lexo edhe:
