Një krim i rëndë me protagonist një të sëmurë psikik francez dhe një vajzë të re shqiptare, ka tronditur së fundmi Belgjikën.
Mediat vendase njoftojnë se shqiptarja 33 vjeçare, Xhuliana Lala, e cila punonte kamariere në një hotel në Ruisbroek në Belgjikë, u vra brutalisht nga një klient, me një bombol që shërben për emergjencë në shuarjen e zjarreve.
Nata e të dielës së kaluar ka qenë fatale për Lalën, e cila punonte si kamariere në këtë zonë prej 5 vitesh. Kjo pasi një francez 36 vjeçar i cili kishte zgjedhur të pushonte në hotelin ku ajo punonte, papritur u shfaq në dhomën e saj dhe e masakroi për vdekje me bombolën e emergjencës.
Më pas ai ka deklaruar në polici, se ka dëgjuar zëra, duke përfshirë edhe atë të djallit, që sipas tij e kishin urdhëruar që të vrasë kamarieren.
Për këtë arsye, ai ashtu siç ishte i zhveshur ka lënë dhomën e tij dhe ka shkuar në dhomën ku qëndronte punonjësja e hotelit, shqiptarja Xhuljana Lala.
Një anëtar i stafit të hotelit zbuloi të gjithë skenën e krimit. Burri ishte ende i zhveshur pranë viktimës dhe i kishte kryqëzuar kyçet e duarve, sikur të ishte gati të arrestohej.
“Unë e vrava atë sepse djalli më urdhëroi ta bëja këtë gjë. Më arrestoni tani”, kanë qenë fjalët e tij të para duke mos bërë asnjë kundërshtim ndaj policisë.
Sipas mediave belge, francezi 36-vjeçar, ishte arratisur nga një rezidencë psikiatrike në Marsejë të Francës.
Viktima Xhuljeta Lala nga Divjaka kishte vite që jetonte në zonën e quajtur Jesse në Belgjike me motrat dhe vëllanë e saj dhe prej 5 vitesh punonte si kamariere në këtë kompleks buze autostradës.
