Kryeministri Edi Rama foli këtë të Martë për mos kandidimin e ish-ministrit të Jashtëm Ditmir Bushati në zgjedhjet e ardhshme.
Rama tha se Bushatin nuk e ka përfshirë në lista, jo për shkak të armiqësisë apo konflikteve mes tyre, por sepse sipas Ramës, Bushati, ditën e parë që u ndryshua si drejtues i Shkodrës “ka zbritur nga treni”.
Rama tha se e mat perfomacën e pjesëtarëve të PS me “sa duarsh njerëzish ka takuar, sa fshatarë, sa biznese, sa qytetarë ka takuar apo sa i di problemet e zonës”.
Në këtë aspekt, shtoi Rama, Bushati “ka zbritur nga treni” dhe “nuk e ka punuar tokën”.
“Bushati ditën e parë që u ndryshua si drejtues i Shkodrës ka zbritur nga treni dhe nuk është shfaqur më në asnjë aktivitet që nuk janë puna juaj. Nuk janë televizive. Janë pjesë e pandashme e punës të çdo njeriu që ka një mandat nga socialistët. Ç’kam me Bushatin unë? Ka mendime të tijat, unë nuk jam dakord. Ai thotë të vetat, unë të miat. Jeta vazhdon. Nëse do të punonte tokën, shumë nga ato që thotë s’do i kishte thënë. Se aty ka qenë. Bushati nuk ka si të jetë në skuadër por. nuk e ndryshon vlerësimin tim dhe gatishmërinë që të bëj debat me të”, deklaroi.
“Partia të vë po s’të mban, mban veten”, shtoi Rama.
Bushati, vijoi ai, “është njeriu im” dhe “shpresoj të hipë sërish në tren”.
