Nga BoldNews.al
Zyrat e Agjencisë së Zhvillimit Bujqësor dhe Rural (AZHBR) në Tiranë janë vendosur nën hetim nga OLAF, Zyra e Antikorrupsionit në Bashkimit Europian, e cila po heton mënyrën e përdorimit të fondeve të projektit “IPARD II” për subvencionimin e bujqësisë shqiptare.
Ky fakt bëhet i ditur nga Vojo Bregu, koordinator i Lëvizjes Socialiste për Integrim (LSI) në Tiranë.
Në një status në rrjete sociale, Bregu shkruan se “para 10 ditësh, OLAF ka nisur një operacion blic në zyrat e AZBR-së, e cila menaxhon fondet e BE për subvencionimin e fermërëve shqiptarë”.
Sipas Bregut, zyrtarët e OLAF-it kanë hyrë në zyrat e shtetit shqiptar si “në një vend krimi” dhe “u kanë kërkuar punonjësve që të dorëzojnë telefonat. Po ashtu, kanë sekuestruar kompjuterat dhe dokumenta të tjerë”.
Zyra Europian Kundër Mashtrimit (OLAF) “nuk jep informacion për çështjet nën hetim”, shkruan Vojo Bregu, i cili vijon se “kjo është hera e parë që institucionet e shtetit shqiptar hetohen zyrtarisht për fondet e IPARD.
Sipas zyrtarit të Lëvizjes Socialiste për Integrim, “pikërisht, në kohën që (qeveritarët) menduan se e futën drejtësinë në xhep, vetë BE ka vendosur të mos lejojë masakrën e fondeve të IPARD-it”.
Vojo Bregu, në statusin e tij në rrjete sociale, ka një thirrje edhe për Ministren e Bujqësisë, Milva Ekonomi, që të njoftojë Prokurorinë Shqiptare, SPAK, mbi investigimin që po kryejnë inspektorët ndërkombëtarë.
Programi IPARD është mbështetje financiare për bujqësinë dhe zhvillimin rural nga fondet e BE-së (75%) dhe qeverisë shqiptare (25%).
Ky program menaxhon disa dhjetra milionë euro, të cilat duhet t’u shpërndahen fermerëve shqiptarë në formë subvencioni për projekte zhvillimore dhe inovatore.
Megjithatë, fermerët gjenden në vështirësi të mëdha për të siguruar subvencione, për shkak të një numri të lartë kriteresh që u nevojiten paraprakisht.
Por, megjithëse numri i fermerëve përfitues është shumë i vogël në krahasim me pritshmëritë, duket se menaxhimi i fondeve të IPARD ka ngritur hije dyshimi, aq sa, sipas koordinatorit të LSI, Vojo Bregu, ka detyruar investigatorët e OLAF-it për të verifikuar në vend mënyrën e përdorimit të miliona eurove.
Zyra Europiane Kundër Mashtrimit (OLAF) është organi i vetëm i BE-së i mandatuar për të zbuluar, hetuar dhe ndaluar mashtrimin me fondet e Bashkimit Europian. Kjo zyrë ka një status të pavarur në funksionimin e saj dhe është pjesë e Komisionit Europian.
