Vasilika Hysi nuk do të jetë më pjesë e Partisë Socialiste.
Tërheqja e Hysit është njoftuar gjatë një aktiviteti që kryeministri Edi Rama bashkë me anëtarë të tjerë të PS-së zhvilloi këtë të Mërkurë. “Vasilika ka vendosur ti hapë rrugën kalamajve”, tha Rama.
Pasi kryeministri njoftoi se Hysi s’do të jetë në listat e PS për zgjedhjet e 25 Prillit, ajo u shpreh me superlativa për Edi Ramën dhe partinë e drejtuar nga ai. Një fjalim me nota servilizmi i Vasilika Hysit, e cila edhe pse erdhi me bujë në PS nga shoqëria civile, mbeti në një nivel militantizmi që e gjejmë rëndom në Partinë Socialiste. Deklaratat e saj ishin thuajse në të njëjtin frekuencë me ato të Elisa Spiropalit, e cila e barazon Ramën me Heroin Kombëtar, Skënderbeun.
Hysi fol ime superlativa edhe për “drejtësinë e re”, që në fakt ka marrë kritika të shumta dhe cilësohet si një zgjatim i pushtetit të Edi Ramës.
“Kënaqësi që sot siç hyra 12 vite më parë në politikë, sot bëj këtë dalje publike për të thënë që jam e nderuar dhe e respektuar që mundëm të bëjmë realitet reformën në drejtësi”, deklaroi Vasilika Hysi.
“Unë ndihem shumë krenare që iu bashkova Partinë Socialiste… Unë sot ndihem shumë e privilegjuar. Ndihem e priviligjuar që kam qenë pjesë e kësaj reformë që ju zoti kryeministër më keni besuar. Keni mbështetur dhe promovuar gratë dhe vajzat”, tha mes të tjerash ajo.
Vasilika Hysi, është deputete në Kuvendin e Shqipërisë, për qarkun e Tiranës, Kryetare e Komisionit të të Çështjeve Ligjore, Administratës Publike dhe të Drejtave të Njeriut dhe Kryetare e Nënkomisionit për të Drejtat e Njeriut.
