Dega e Lëvizjes Socialiste për Integrim në Skrapar ka denoncuar blerjen e një automjeti me vlerë 25 milionë lekë nga ana e bashkisë së qytetit.
Në denoncimin e bërë në rrjete sociale thuhet se kryebashkiaku i Skraparit nuk e kursen dorën kur bëhet fjalë për buxhetin e shtetit, në një vit kur pandemia ka goditur rëndë çdo biznes dhe familje shqiptare.
LSI Skrapar thekson se ato 25 milionë lekë mund të ishin shpenzuar për familjet në nevojë apo personat me aftësi të kufizuar.
“Kryebashkiaku i Skraparit qenka treguar dorëlëshuar për të blerë një automjet, ndërkohë që nuk bën asgjë për të mbështetur dhe investuar në nisma që krijojnē vende të reja pune apo që zbusin varfërinë në Skrapar. E gjitha kjo ka një shpjegim: Përfaqësuesit e Rilindjes kanë një raport shumë të mirë me luksin që buron nga abuzimet dhe shpërdorimet, por nuk kanë aspak lidhje me angazhimin për të zgjidhur hallet e shqiptarëve.
25 milionë lekët e makinës së luksit të Bashkisë së Skraparit, mund të ishin shpenzuar për familjet në nevojë apo personat me aftësi të kufizuar, por mesa duket hallexhinjtë nuk figurojnë fare në axhendën e kryetarit të Bashkisë!
LSI Skrapar dënon me forcë këtë abuzim! 25 Prilli do të jetë një ditë historike, sepse do ti japë fund keqqeverisjes dhe praktikave abuzive të Rilindjes, në kurriz të qytetarëve shqiptarë!”, thuhet në reagimin në rrjetet sociale.
