Në orën 07:00 janë hapur qendrat e para të votimit në Kolonjë për zgjedhjen e Kryetarit të ri të Bashkisë. Kandidati i Partisë Socialiste është mjeku Ilia Stefa ndërsa Partia Demokratike ka vendosur përballë tij, kandidatin Dritan Hajro, propozim i Partisë Agrare Ambientaliste, aleate me PD.
Aktualisht procesi po vijon normalisht në 8 qëndrat administrative të Kolonjës. Në total janë rreth 7700 qytetarë me të drejtë vote të cilët do të caktojnë fituesin e Bashkisë së Kolojnjës.
Zgjedhjet e Kolonjës vijnë pas humbjes së jetës së ish-kryetarit të bashkisë, Agron Malo. Sipas marrëveshjes së koalicionit të majtë të 15 marsit 2015, kjo bashki i ishte lënë Lëvizjes Socialiste për Integrim, por kjo e fundit u tërhoq nga gara e këtyre zgjedhjeve.
Ndërkohë e djathta nuk ka kandiduar me një kandidat të vetin, duke ia lënë territorin e Kolonjës aleatëve.
Në zgjedhjet e qershorit 2015, kandidati i koalicionit të majtë doli fitues më rreth 700 vota më shumë se kandidati i djathtë, ndërkohë në këto zgjedhje ashtu si në Dibër nuk do votohet për sigla partie, gjë që e bën të pamundur peshën specifike të tyre në rezultatin përfundimtar, duke ia lënë përgjegjësinë kandidatëve.
