Bashkimi Europian do të diskutojë nesër idenë e pasaportës së vaksinimit që do të lejojë lëvizjen e lirë për ata që kanë marrë dozat kundër koronavirusit. Kjo përpjekje po bëhet për të shpëtuar sezonin e ardhshëm turistik. Por dilemat dhe pikëpyetjet janë të mëdha.
“Ka akoma shumë gjëra që nuk dimë” tha një anëtar i bllokut Evropian, shkruan Reuters. “Na duhet më shumë kohë për të arritur në një vijë të përbashkët” shtoi ai.
Por kush janë skeptikët? Kancelarja Angela Merkel është kundër. Franca dhe Gjermania janë më ngurruese për idenë e pasaportës së vaksinimit, pasi zyrtarët theksojnë se plani mund të krijojë një detyrim vaksinimi “de facto” dhe të diskriminojë ata që nuk mund ose nuk do të marrin vaksinën.
Franca, ku tendenca anti-vaksinuese është veçanërisht e fortë dhe ku qeveria është zotuar të mos bëjë vaksinat e detyrueshme, e konsideron idenë e pasaportave të vaksinimit “të parakohshme”, tha një zyrtar francez sot.
“Kërkohet punë për detajet e planit, të tilla si nëse certifikata duhet të lëshohet në formë dixhitale, nëse do të pranohet botërisht dhe në cilën fazë të procesit të vaksinimit, certifikata duhet të lëshohet” tha një tjetër zyrtar i BE-së. Shqipëria e ka përgatitur pasaportën e vaksinimit.
