Grushte, katër lojtarë të përjashtuar, 15 minuta ndërprerje e lojës, irritim tifozësh dhe forca të shumta policie është bilanci i ndeshjes Vllaznia-Tirana. Kryendeshja e javës së 6-të të Superligës, e luajtur në pallatin e sportit “Qazim Dervishi”, doli shumë shpejt nga shinat e një ndeshjeje sportive kur Xhonson i Tiranës dhe Ndoja i Vllaznisë acarohen me njëri-tjetrin duke shkëmbyer fjalë me tone të larta.
Ndeshja ndërpritet dhe në parket janë edhe stafet bashkë me lojtarët e stolit. Mes acarimit momental, Karaj i jep një grusht të pastër në nofull trajnerit të Vllaznisë, Bledar Gjeçaj duke e tronditur sikur të ishte në një ring boksi. Kaq mjafton që edhe tifozët e shumtë të pranishëm të irritohen me këtë gjest antisportiv të Karajt.
Tiranasi vijon edhe më tej protagonizmin teksa nuk bindet dhe shkëmben sharje dhe fyerje me Gjon Ndojën. Edhe Dodë Lekndreaj debaton me Shimën e Tiranës. Arbitrat e kësaj sfide, të shoqëruar nga forcat e policisë, ndërpresin ndeshjen teksa duheshin edhe 15 sekonda për t’u mbyllur perioda e parë. Rezultati ishte 24-19 në favor të Vllaznisë, gjë e cila qartazi ndikoi edhe te shfaqja e nervozizmit të bardhebluve.
Në pak minuta në pallatin e sportit shtohen efektivët e policisë teksa mbërrijnë edhe shefi i rendit Saimir Rrustemi dhe shefi i komisariatit në policinë e Shkodrës, Alfred Cenaj. Pas shumë ndërhyrjeve për të qetësuar gjakrat, arbitrat vendosin që loja të rifillojë pas 15 minutash ndërprerje.
Ndoja dhe Dodë Lekndreaj për Vllaznisë së bashku me Shimën dhe Xhonson të Tiranës marrin një teknikë përjashtimi. Vllaznia e mbyll me fitore 47-44 pjesën e parë të ndeshjes. Kuqeblutë nuk mund të bëjnë më shumë, sepse përjashtimi i Ndojës dhe Lekndreajt prish totalisht planet. Ndryshe nga Tirana, që pavarësisht përjashtimit të Xhonson dhe Shimës, kishte mjaftueshëm lojtarë cilësorë edhe në stol.
Për Vllazninë, gjërat nuk shkojnë mirë sepse dëmtohet edhe lideri Bërdica duke u larguar me 24 pikë të shënuara, teksa loja ende nuk kishte mbaruar. Tirana arrin të fitojë 84-66 në Shkodër në një sfidë që më shumë se emocione sportive përcolli gjestet antisportive. /Panorama Sport/
