Dy persona janë arrestuar lidhur me grabitjen e një kabisti në Korçë në fund të muajit Janar.
Në pranga e policisë ka rënë Martin Arrëza, pasi akuzohet si njëri prej autorëve të grabitjes në shtëpinë e kambistit në Korçë.
33-vjeçari mësohet se ka qenë polic dhe është me prcedent penal, sepse ka qenë i dënuar për falsifikim. Arrëza falsifikonte dokumente për kalim të paligjshëm.
Ai përdorte një dokument policie dhe simbole dalluese për t’u prezantuar si punonjës policie, me qëllim shmangien e kapjes nga Policia.
Gjithashtu është arrestuar edhe Adhurim Shega, 28 vjeç, i cili strehonte Arrëzan në shtëpinë e tij në Tiranë.
Shtetasit e mësipërm u kapën në Tiranë me mjetin tip “Volksëagen Polo”, në pronësi të ish-policit.
Ndaj 33-vjeçarit, Gjykata e Rrethit Gjyqësor Korçë, me vendimin e datës 28.01.2021, ka caktuar masën e sigurisë “Arrest në burg” për veprën penale “Vjedhja me dhunë e kryer në bashkëpunim” në lidhje me ngjarjen e ndodhur në 11.01.2021, në Korçë.
Nga ana e Policisë është identifikuar dhe bashkëpunëtori i tretë i dyshuar për këtë ngjarje dhe po punohet për kapjen e tij.
Materialet i kaluan Prokurorisë pranë Gjykatës së Shkallës së Parë Korçë, për veprat penale “Vjedhja me dhunë” kryer në bashkëpunim, “Mbajtja pa të drejtë e uniformës” dhe “Përkrahja e autorit të krimit”, njoftoi policia.
