Ylli i PSG-së, Nejmar rrezikon të pezullohet dy ndeshje në Ligën e Kampioneve pas komenteve që shprehin pakënaqësi për penalltinë e Barcelonës dje ndaj francezëve dhe golin e Lionel Mesit nga 11 metra.
Braziliani shfryu në “Twitter” gjatë kohës që po ndiqte takimin mes katalanasve dhe parizienëve.
“Qeshni me këtë penallti! Gol m**i!”, shkroi 29-vjeçari në “Twitter”.
Edhe pse ai e fshiu brenda pak momentesh postimin e tij, qëndrimi i shprehur ndaj gjykimit dhe komentet jo të përshtatshme mund të detyrojnë UEFA-n që ta përjashtojnë Nejmarin për dy ndeshje.
Barcelona fitoi penallti në minutën e 27-të kur Frenk De Jong u rrëzua me këmbët e veta gjatë një aksioni në zonën e PSG-së. Edhe pse pamjet treguan se mesfushori holandez u rrëzua vetë, për arbitrin Bjorn Kuipers ishte 11-m. Megjithatë, PSG-ja arriti ta përmbyste sfidën dhe fitonte me rezultatin e thellë 1-4.
