Pas parakalimit të Milanit në tabelën e klasifikimit, te Inter shikojnë nga e ardhmja. Zikaltërit kërkojnë që të blindojnë futbollistët aktual dhe i pari në listë gjendet sulmuesi argjentinas, Lautaro Martinez.
23-vjeçari ka tërhequr vëmendjen e shumë skuadrave dhe për këtë, Inter kërkon t’i zgjasë kontratën. Në tryezën e Martinez gjendet një kontratë deri në vitin 2024 pa klauzolë lirime, nga e cila do të përfitojë 4.5 milionë euro në sezon plus bonuse. Kjo zgjatje do të ratifikohet zyrtarisht në fund të muajit, kur përfaqësuesit e Argjentinës do të kthehen në Itali.
Por rinovimi i Martinez nuk është i vetmi për të cilin po punojnë drejtuesit e Interit. Në listë për të rinovuar gjenden dhe dyshja, Barella-Bastoni. Mesfushori ka fituar zemrat e të gjithëve dhe përpos marrëveshjes, Inter është gati ta shpërblejë dhe me shiritin e kapitenit, duke vlerësuar maksimalisht performancën e tij në fushën e blertë.
Ndërkaq, për Bastonin, Inter dëshiron që ta ketë të vetin të paktën deri në vitin 2024, duke e çuar pagën e tij në 2.5 milionë euro në sezon.
