Gazetari Artan Hoxha, i ftuar në emisionin “Të Paekspozuarit” të Ylli Rakipit në “News24” ka folur për skemën e re të organizimit të kultivimit dhe shitjes së kanabisit.
Hoxha tha se këto vite, që pas rënies së Lazaratit është vënë re sipas tij një strukturë komplet tjetër e kultivimit të kanabisit.
Ai shpjegon se ata që merren me kanabis ndahen në 5 shkallë kryesore. Kështu, Hoxha thotë se në krye të listës qëndrojnë ata që i cilëson si grosistë.
“Grosistët janë ata që njohin tregun, që kanë lidhje me jashtë dhe që e shesin jashtë kanabisin. Pra grosistët janë trafikantët që janë në krye të listës.
Të dytët janë financuesit. Këta janë persona, kryesisht biznesmenë që kanë biznese legale, por që po dështojnë. Dhe këta, në vend që t’i çojnë paratë në banka i investojnë në kanabis”, tha Hoxha.
Të tretët janë garantuesit e terrenit. Këta janë deputetë, policë, gjyqtarë, prokurorë, zyrtarë vendorë, të cilët garantojnë paprekshmërinë e vendit ku do të mbillet kanabisi.
Pas tyre vijnë organizatorët, të cilët marrin paratë nga financuesit, gjejnë tokat ku do të mbillet kanabisi, gjejnë punëtorët dhe mjetet e punës, si edhe grupin e armatosur që do të ruajë parcelat”.
Të fundit sipas Hoxhës janë punëtorët.
Por Hoxha thotë se garantuesit dhe punëtorët janë ata që fitojnë nga kjo sipërmarrje, pasi ata paguhen që në fazën e mbjelljes dhe korrjes së kanabisit.
“Këta paguhen që në fillim, punëtorët paguhen psh në fund të çdo ditë. Kur droga kapet, humbin financuesit”, tha ai.
