Telashe për Luixhi Sartor. Ish-futbollisti i Juventusit, Interit dhe Romës është arrestuar pasi “Guardia di Finanza” e qytetit të Parmës ka vëzhguar nga pranë që 46-vjeçari po kultivonte një serë plot me marihuanë.
“Guardia di Finanzia” ka kapur në flagrancë Sartorin së bashku me një bashkëpunëtor teksa po mirëmbanin 106 parcela me kanabis, që kishte vendosur ta kultivonin në një fermë të braktisur në “Lesignano Palmia”, një fshat i vogël në malet e Parmës.
Ish-mbrojtësi i njohur tani është në arrest shtëpie në pritje të gjyqit për të.
Nuk është hera e parë që Luixhi Sartor ka probleme me drejtësinë italiane. Në vitin 2011 ish-futbollisti përfundoi pas hekurave pas hetimit për trukime të ndeshjeve të futbollit të filluar nga Prokuroria e Kremonës, edhe pse tetë vite më vonë ai u lirua nga Gjykata e Bolonjës.
