Përpos humbjes 122-105 ndaj Denver sot në kampionat një tjetër lajm i keq ka ardhur për skuadrën kampione të NBA-së, Lakers.
Ylli i skuadrës, Anthony Davis është detyruar të lërë fushën e lojës pas vetëm 15 minutash lojë (15 pikë), për shkak të një dëmtimi në “thembrën e Akilit”.
Për momentin nuk dieht shkalla e dëmtimit dhe priten ekzaminimet e radhës për të mësuar situatën. Davis nuk luajti javën e kaluar 2 ndeshjet ndaj Oklahomës për të njëjtin problem dhe frika se mos aktivizimi sot ka qenë i parakohshëm mund të sjellë një “stop” të gjatë të lojtarit.
“Nuk jam nxituar në aktivizimin tim, pasi isha në formë. Gjithsesi, presim rezultatin e rezonancës magnetike për të vendosur”, tha lojtari, që do të udhëtojë me skuadrën në Minneapolis për ndeshjen e radhës ku dhe do të kryejë ekzaminimet mjekësore. Gjithsesi, gjasat janë që ai të mos luajë sërish 2-3 ndeshjet e radhës.
