Nga Boldnews.al
Ministrja e Arsimit, Evis Kushi, njoftoi mesditën e së Shtunës se i gjithë sistemi arsimor do të pezullohet gjatë javës së ardhshme, për shkak të kushteve atmosferike.
Urdhëri, i cili i drejtohet të gjithë institucioneve arsimore, kap të papërgatitur prindërit e fëmijëve që janë të punësuar dhe nga ana tjetër dëshmon se propaganda e qeverisë për përmirësimin e kushteve në shkollat publike është thjeshtë një fasadë që tenton të mbulojë mungesën e investimeve në institucionet e dijes.
Sipas ministres së Arsimit, nga data 15 deri në 19 Shkurt 2021, shkollat 9-vjeçare, të cilat ishin të vetmet që zhvillonin mësim në auditore, do të kalojnë në leksionet on-line.
Por, Urdhëri i Kushit nuk jep asnjë zgjidhje se si do të qëndrojnë në shtëpi dhe si do të zhvillojnë mësim on-line fëmijët e mitur, të cilët kanë prindërit e punësuar.
Në një situatë të ngjashme atmosferike pak vite më parë, Bashkia e Tiranës pezulloi mësimin për dy javë në shkollat e qytetit, ndërkohë që Qeveria vendosi që të paktën njëri prej prindërve të fëmijëve të punësuar në administratën publike, do të qëndronin në shtëpi dhe do të paguheshin rregullisht.
Po ashtu, në atë kohë, qeveria u bëri thirrje edhe bizneseve private që të toleronin prindërit e punësuar në sektorin jo-publik, që të toleronin mungesën e njërit prej tyre, për të mbajtur dhe shoqëruar fëmijët gjatë qëndrimit dy-javor në shtëpi.
Kësaj radhe, ministrja Kushi i ra shumë shkurt. Ajo vendosi pezullimin një-javor të shkollave, ndërkohë që prindërit duhet ta zgjidhin vetë se si do të menaxhojnë punën dhe fëmijët gjatë orarit të punës.
Nga ana tjetër, Urdhëri i ministres Evis Kushi është një tregues për gjendjen e vështirë, në të cilën gjenden shumica dërrmuese e institucioneve arsimore publike në Shqipëri.
Mjafton vetëm një ulje temperaturash, tipike për stinën e dimrit, dhe qeveria, nëpërmjet Ministrisë së Arsimit, vendos pezullimin e aktivitetit normal të mësimdhënies.
Kjo masë duket se është e detyruar për Ministrinë e Arsimit, duke mbajtur në konsideratë se shumica absolute e shkollave publike në vendin tonë, kanë mungesë të theksuar të masave për përballimin e situatave të vështira atmosferike.
Pavarësisht shpenzimeve multi-milionëshe për fasadat e shkollave, godinat e arsimit parauniversitar janë në një gjendje të vështirë, sa u përket sigurimit të ngrohjen në periudhën e ftohtë të dimrit.
Për të fshehur gjendjen e mjeruar të shkollave, e cila bëhet shumë evidente sidomos gjatë periudhës së ftohtë të dimrit, qeveria, nëpërmjet Evis Kushit, ka gjetur zgjidhjen më të shpejtë, por aspak efikase-pezullimin disa ditor të mësimit, duke i vendosur prindërit e punësuar në një situatë aspak komode.
