Ditët e fundit “Jews Chronicle ”, gazeta më antike hebre e cila publikohet në gjuhën angleze në Londër që nga viti 1841, ka publikuar një artikull të gjatë për vrasjen e Mohsen Fakhrizadeh. Shkencëtari bërthamor iranian u vra në një atentat në 27 nëntor të 2020-ës. Ai ishte pagëzuar nga izraelitët me epitetin “babai” i programit bërthamor iranian. Dhe për atë arsye vrasja e tij ishte shumë e komplikuar. Ajo u organizua nga Mossad dhe njerëzit e saj me shtetësi iraniane pas një pune disa mujore.
Rindërtimi i ngjarjes konfirmon disa elementë që qarkullonin që në muajin dhjetor. Përdorimi i një mitralozi automatik, që peshonte një ton. Arma ishte futur në Iran, pjesë pas pjese dhe u hodh në erë me gjithë automjetin ku ishte vendosur, pikërisht për të mos lënë gjurmë për hetuesit iranianë.
Roli i Fakhrizadeh në programin bërthamor iranian ishte zbuluar nga Izraeli në vitin 2018 pas vjedhjes së një arkivi të rëndësishëm në Teheran, i cili përmbante të dhëna për programin bërthamor. Nga arkivi u zbulua dhe roli i shkencëtarit i cili drejtonte disa sektorë të rëndësishëm.
Operacioni për eliminimin e tij fizik nisi në mars të 20202-ës. Një skuadër agjentësh sekretë nga Izraeli hyri në Iran dhe u bashkua me agjentë të tjerë vendorë: gjithsej ishin 20 persona. Për tetë muaj kjo skuadër studioi çdo lëvizje të tij, aq sa dinin dhe se çfarë lloj parfumi përdorte.
Atentatorët izraelitë vendosën ta qëllonin ndërsa ai udhëtonte drejt vilës familjare në periferi të Teheranit. Profesori shoqërohej nga të paktën 12 truproja, me katër automjete. Agjentët izraelitë u vendosën në një foristradë Nisan në anë të rrugës që ai bënte zakonisht.
Mitralozi qëlloi të paktën 13 herë, por asnjë nga truprojat apo bashkëshortja e tij që ndodhej në automjet me të nuk u prekën nga plumbat. Por gazeta shton dhe një detaj të veçantë, administrata e Trump nuk ishte paralajmëruar. Amerikanët nuk u përfshinë dhe ai ishte një operacion izraelit.
