Nga Fliri Mosho
U desh që pronarët fantazëm të një biznesi tregtie të paligjshme të shpallnin me vullnetin e tyre falimentin, që dikush të kujtohej prap për AMF.
Por mbase zullumi është shtuar, ndaj edhe atë që media e paguar me reklama biznesi dhe politika që sponsorizon kolektivisht bordet që duhet të mbikqyrin, nuk po mund të mbajnë dot skemat që kanë ngritur në këmbë.
Ndaj vjen një ditë dhe shpallin falimentin. Me koston e atyre, interesat e të cilëve duhet të mbroheshin nga shteti.
Nëse hap faqen zyrtare të Autoritetit të Mbikqyrjes Financiare, në anë të majtë, me stilistikë deklarate, është vendosur në kornizë qëllimi kryesor i funksionit të këtij mbikqyrësi: është mbrojta e cdo qytetari të Republikës së Shqipërisë që dëshiron me nismë të vetë të investojë në tituj financiare.
Edhe e atyre që një mëngjes të bukur, i ka rënë zilja e celularit, (dreqi e di se si mbikqyrësi tjetër i mbrojtjes së të dhënave personale ua lejon edhe këtë), dhe dikush i panjohur për ta, i ka propozuar fitimin e lehtë nëpërmjet investimit të cash-it të tyre, në ca produkte financiare për të cilat kurrë më parë nuk kishin dëgjuar.
Nuk ka nevojë të punosh në AMF për të zbuluar që ka një skemë të tillë që sot funksionon edhe me “mbikqyrjen“ e AMF (të asaj që na ruan edhe investimin në kompanitë e sigurimit). Nuk është e domosdoshme të punosh në AMF për të zbuluar që SOT ka edhe dy skema të tjera pirate si kjo e investimit te kollajshëm (easy investment).
Por është interesante të punosh në AMF dhe të mos ndezësh asnjë sinjal alarmi, kur të bie edhe ty vetë celulari nga operatorët e këtyre skemave “investimi“ që të ftojnë të investosh. Pa frikë ….. ndaj dyshoj duke e ditur se cilët ishin numrat e celularit që kishin zgjedhur për të telofonuar.
Është interesante të jesh SOT, drejtues i AMF dhe të shkruash e fshish deklarata për shtyp pasi vendos që kur je zhytur deri në fyt është më mirë të mos e hapësh gojën.
Unë nuk punoj në AMF! Ndaj mund te flas si njeri i lire!
Investimi në tituj financiare, është një fushë ende e panjohur investimi për individët shqiptare dhe AMF aktualisht nuk ka në funksionim asnjë masë të posaçme të karakterit informues dhe edukues të publikut. Deri më sot nuk ka asnjë rast që AMF, të ketë bërë ndonjë njoftim publik me qëllim ndërhyrjen për ndalimin apo korrigjimin e përmbajtjes së njoftimit. Zhvillimet e fundit për fillimin e operimit te platformave të tregtimit online, e bën edhe më imediate, aplikimin e fushatave informuese mediatike nga AMF për publikun. Pjesmarrja në shit-blerje titujsh, nëpërmjet platformave të tregtimeve online, konsiderohet investim me rrisk të lartë dhe tregtimi nëpërmjet tyre mbart rrezik të konsiderueshëm edhe nëse skema ngrihet e funksionon në vende me standarte mbikqyrje. Imagjino me këtë AMF që kemi ne!
Kjo vlen për nesër! Sot duhet të flasi Ligji….
Kuvendi që duhet të mbikqyrte AMF e që duhet ë kish mirartuar raportin e vlerësimit të punës së AMF të paktën që prej Majit të këtij viti, sot nuk mund të flasë më. Folën të falimentuarit. Kuvendi falimentoi bashkë me ta.
