Shkrimtari i njohur Ismail Kadare ka vizituar ekspozitën personale të piktorit gjirokastrit Bashkim Ahmeti Izano, e cila prej më shumë se dy javësh qëndron e hapur në Galerinë Kombëtare të Arteve.
Në këtë vizitë ai u shoqërua nga vetë artisti Ahmeti, aktori Timo Flloko dhe u prit nga drejtori i Galerisë Kombëtare Artan Shabani.
Një pjesë e mirë e tablove të kësaj ekspozite ishin me portrete kushtuar shkrimtarit.
Është e njohur miqësia mes piktorit dhe shkrimtarit, të cilët njëri përmes librave dhe tjetri përmes ngjyrave i kanë dhënë jetë duke e bërë të jashtëzakonshme përvojën e tyre jetësore në qytetin e Gjirokastrës. Qyteti i treguar në tablotë e Ahmetit është magjik, e gati-gati surreal, me një atmosferë që të fton të hulumtosh apo ta gjesh.
Janë gati 90-të punime që Ahmeti prezanton në këtë ekspozitë, që mund të thuhet është nga më të vizituarat nga publiku. Një javë më parë ajo u vizitua dhe nga kryeministri Edi Rama. Ekspozita përmban dy cikle kryesore. Cikli i parë kryesisht me temë nga Shqipëria përmbledh kompozime, nudo, peizazhe nga Gjirokastra e bregdeti Jon, si edhe peizazhe nga New Yorku, ndërsa cikli i dytë kushtuar shkrimtarit Ismail Kadare, vjen me punë të cilat datojnë nga 10-15 vite më parë e deri me sot. Pak ditë më parë i pyetur mbi frymëzimin mbi figurën e Kadaresë, vetë Ahmeti do të shprehej se “ Unë jam një admirues i letërsisë së tij, madje adhurues i artit të tij, ky është pozicioni im, ai është shkrimtari i madh, gjeniu i letrave shqipe”.
“Kështu kam pasur rastin të takohemi edhe të diskutojmë, por përgjithësisht raporti im me të është raporti i një adhuruesi të letërsisë dhe artit të tij. Nga ana tjetër si piktor jam admirues i personalitetit dhe ndjekës i ideve të tij. Idetë e Kadaresë janë në fondamentin e mbrujtjes time intelektuale, në një farë mënyre unë jam një Kadarean nga idetë dhe nga kultura. Kjo punë më ka ngrënë një kohë të gjatë duke filluar nga 2002 për të mbaruar në 2016. Vazhdimisht kam punuar, kam bërë kërkime, jam munduar ta shoh në perspektiva të ndryshme, duke u kthyer kështu në një sprovë në gjininë e portretit. Gjithashtu qyteti i Gjirokastrës na bashkon në këtë mes duke qënë qyteti i Kadaresë por edhe qyteti im, aty ku unë kam marrë impaktin e parë kur kam ardhur në jetë. Jam vazhdimisht nën imazhin dhe impresionet e Gjirokastrës, por sigurisht mënyra si e ka parë Kadareja Gjirokastrën nuk mund të ketë shkuar pa influencuar përfytyrimet e mija”, tha Ahmeti.
