Nga BoldNews.al
Një situatë e rëndë po ndodh në Bashkinë e Tiranës. Lajmi se Erion Veliaj është gjobitur nga Komisioni Qëndror i Zgjedhjeve, pasi dukshëm dhe me prepotencë ka shkelur rregullat e fushatës elektorale, ka shqetësuar stafin e bashkisë. Lali Eri i tyre është gjobitur “rëndë”…
Kanë qenë disa ankesa në KQZ, kryesisht nga përfaqësuesit e mazhorancës për shkelje të rregullave të fushatës që çuan KQZ-në në këtë vendin “drastik”. Mësohet se Veliaj është gjobitur me 35 mijë lekë pasi nuk ka deklaruar aktivitetin që ka kryer gjatë fushatës në cilësinë e kryebashkiakut dhe drejtuesit politik në Tiranë, si dhe 40 mijë lekë për mosdeklarim të aktiviteteve të ndaluara.
Është një shumë e “madhe” për të. I ikën gati gjysma e rrogës mujore dhe ky është një problem serioz, sepse ka veten, bashkëshorten dhe fëmijën për të mbajtur. Është shtylla e shtëpisë dhe kjo gjobë nuk është pak, sepse kryebashkiakun e Tiranës ajo rrogë e mban!
Dilema është që punonjësit e bashkisë të fusin të gjithë nga pak për t’i rekuperuar gjobën, apo të ketë një zgjidhje tjetër? Kjo gjëmë e madhe nuk ka mbetur pa trazuar edhe pjesën e oligarkisë së ndërtimit. Janë pikërisht gjashtë biznesmenë të fuqishëm që me lejet e ndërtimit të dhëna nga Veliaj po rrisin bizneset çdo ditë që sot po mendojnë edhe për gjobën e Lalit. Vetë biznesi i oligarkisë së ndërtimit ka shtuar llogaritë bankare edhe në kohë pandemie dhe shumojnë shifrat e frikshme, pikërisht nga “mirësia” e Lali Erit.
Kullat dhe pallatet lartësohen çdo ditë, ndërsa vendi është kthyer në epokën e betoniereve të oligarkisë dhe me dyshimin se nëpërmjet ndërtimit po pastrohen edhe paratë e mafias italiane. Megjithatë Lali Eri është në hall dhe i thonë “buka e gojës”. Vetë biznesmenët e fuqishëm të ndërtimit po diskutojnë me shumë shqetësim. Po ja i bënë aq para sa të paguajnë gjobën e Lalit, po a do i pranojë vallë?
Kjo është një çështje që duhet menduar mirë prej tyre, se mbase e fyejnë po ia paguan gjobën, mbase ai nuk i pranon dhe kjo mund tu kushtojë shtrenjt, sepse Lali Eri mund të mërzitet dhe nuk u jep më leje ndërtimi. Po ka ende shpresë… Dikush nga oligarkët mësohet se ka folur shtruar si “burrat e motshëm”, duke iu kujtuar të tjerëve se Erion Veliaj ia ka arritur të gjitha përballjeve të jetesës së shtrenjtë me forcat e veta.
Është një nikoqir i përmasave të admirueshme, një kursimtar për tu futur në librat Guines. Me kursimet nga pensioni i nënës Veliaj arriti të bëjë për veten dy dasma supër luksoze. Po ashtu ka blerë një apartament 171 metra katrorë në Kodrën e Diellit dhe një automjet luksoz që punon me karburant hibrit. Me punë, mund e djersë ia ka arritur.
Lali ka edhe një veti tjetër, që vishet shtrenjt, për të mos ngjarë si “çun zdroms”,-sikurse i quajti meshkujt shqiptarë para disa kohësh. Edhe veshja dhe jetesa e përditshme ka kosto, por kryabshkiaku ia ka dalë. Ja me atë pagë, në fillim si ministër dhe që nga viti 2015 si Kryetar i Bashkisë Tiranë.
Gjoba duhet paguar dhe ky nuk është një lajm i mirë për finacat e Veliajt, sepse jemi në kohë pandemie dhe duhet menduar sesi ta përballojë jetesën. Sot kushdo qytetar i Tiranës duhet të mendojë për numri një të kryeqytetit. Ai djalë duhet ndihmuar, në mos në aspektin monetar, të paktën në atë shpirtëror që ta përballojë gjobën e “rëndë” që i vendosi KQZ-ja. Mbahu Erion, do ia dalësh edhe këtë herë! Të lehtë nuk e ka, por me durim ai duket se do e përballojë ndëshkimin me gjobë dhe mbase do kursejë këtë muaj për të paguar ndëshkimin! Kurajo Lali Eri!
