Këngëtarja e famshme me origjinë shqiptare, Eleni Foureira, ka bërë së fundmi një rrëfim të rrallë për largimin e saj nga Shqipëria. Ajo ka treguar se është detyruar që të udhëtonte drejt Greqisë në moshë të vogël, për shkak të luftës civile në Shqipëri.
Eleni ka rrëfyer se në atë kohë babai i saj punonte në Greqi për të fituar para. Ajo shton se ai u ka dërguar një taksi për t’i transferuar në shtetin fqinj.
“Atë ditë nuk e kam harruar kurrë. Në Shqipëri, nëna ime ishte vetëm me 4 fëmijë të mitur. Nëna ime mbante një armë gjahu në shtëpi dhe mbasditeve qëllonte në ajër për të treguar se kishte armë që ne të mos rrezikoheshim. Ishte një heroinë. Kur mami më tha që do largoheshim nuk doja, ishte e vështirë për mua. Ditën kur dola nga shtëpia fillova të qaja”, vijoi Foureira.
