Nga BoldNews.al
Kryeministri Edi Rama lëshoi një kërcënim me gjobitje për qendrat tregtare, paraditen e kësaj të Hëne, në një konferencë ku shfaqi situatën e pandemisë në Shqipëri, nën shoqërinë e Ministres së Shëndetësisë, Ogerta Manastirliu.
Duke vijuar të gjejë tek qytetarët fajtorët për vijimin e përhapjes së virusit Covid-19, Rama lëshoi kërcënimin e radhës për biznesin, i cili, sipas tij, duhet të forcojë masat për të parandaluar infektimin.
Në fjalën e tij, kryeministri u shpreh se: “Ne nuk duam që policia e shtetit dhe inspektoratit të hyjnë dhe të dalin nëpër lokale, bare, nëpër qendra tregtare,restorante e kështu me radhë sepse kjo nuk është në të mirë të biznesit. Për nëse nuk ka reagim patjetër do të ndodhë kështu. Policia e Shtetit dhe inspektoratet do të imponojnë”.
Deklaratat e kryeministrit Rama, sidomos për penalizimin e qendrave tregtare, mund të merret me rezerva. Kjo, jo për mungesën e forcës së shtetit, por për emrat që i zotërojnë qendrat tregtare dhe lidhjet e tyre me shefin e qeverisë.
Në Tiranë, dy prej qendrave më të mëdha tregtare, “QTU” në periferinë perëndimore dhe “TEG” në periferinë juglindore, janë në pronësi të biznesmenit Samir Mane.
Për shkak të sipërfaqes së tyre të madhe, si edhe të përqëndrimit të një numri të konsiderueshëm biznesesh brenda tyre, qendrat tregtare të Manes mund të jenë zona me potencial të lartë për grumbullime të papërshtatshme njerëzish.
Pra, rrjedhimisht, Samir Mane mund të jetë subjekt i gjobitjes nga Policia, në rast se do të konstatohet se në ambjentet publike në pronësi të tij nuk respektohen masat anti-covid.
Të paktën, kështu mund të ndodh teorikisht.
Por, shumë pak besojnë se policët e Edi Ramës do të kenë guximin të gjobisin Samir Manen, nëse nuk do të respektohen rregullat kundër pandemisë në qendrat tregtare “QTU” dhe “TEG”.
Policët e terrenit, inspektorët e shëndetësisë, por edhe shefat e tyre e deri tek ministrat, e kanë të qartë se Edi Rama, nga pozita e kryeministrit, kanë bërë shumëçka për të forcuar financat e biznesmenit Samir Mane.
Pasi i dha statusin e “investitorit strategjik”, Rama ndërmori shumë masa që bizneset e Manes të përfitonin toka në bregdet për të ndërtuar resortet e tij.
Po ashtu, Parlamenti ka miratuar së fundmi disa nisma ligjore, të cilat lehtësojnë barrën fiskale për biznesin e kromit, ku ka interesa të shumta biznesmeni Samir Mane.
Dhe, pasi i ka krijuar shumë lehtësira financiare, tashmë Rama “kërcënon” se do të gjobisë Samir Manen, në rast se ambjentet e tij nuk do të respektojnë masat anti-covid.
