Kompania italiane ‘Aero Club Savona’ kërkon që t’i kthehet avioni tip Piper, i cili u rrëzua në Durrës pak muaj më parë, në tentativën për të trafikuar lëndë narkotike kanabis sativa.
Lajmi bëhet i ditur nga mediat italiane sipas të cilave, kompania italiane në fjalë, i ka dërguar një kërkesë ambasadës italiane në vendin tonë, ku kërkon rikthimin e avionit. Madje sipas mediave italiane, kompania bashkngjitur kërkesës ka dërguar edhe shkresat dhe dokumentat që vërtetojnë pronësinë mbi avionin.
“Avioni Piper është në pronësi të ‘Aero Club Savona’ dhe ne kërkojmë rikthimin”. Thuhet në shkresën e paraqitur në ambasadën italiane në Tiranë, nga avokati Andrea Saccone i punësuar nga Aereo Club Savona. Ky avion edhe pse jo në mënyrë direkte shihet si një mjet i përfshirë në një trafik ndërkombëtar droge ku sigurisht përmendet edhe emri i pilotit të ndaluar. Avioni Piper, është i bllokuar në vendin tonë që nga shtatori, vetëm 30 km në veri të Tiranës, ku si pasjë e rënies avioni ka pësuar dëmtime. Pas rrëzimit, policia shqiptare ndaloi edhe pilotin italian, 69-vjeçarin Guido Andrea Guidi.
Ky i fundit, në fillim tha se ndaloi për shkak të një avarie, ndërsa i marrë në pyetje nga hetuesit pranoi të bashkëpunojë duke treguar se kishte ardhur për të kryer trafik droge në sasi të mëdha. Ndërkohë ende vijojnë hetimet për këtë çështje.
