Seanca në gjykatën e Apelit të Krimeve të Rënda ka nisur me tensione ku gjykohen nëntë të dënuarit në procesin e konsideruar Imamët e vetëshpallur nën akuzë për terrorizëm e rekrutim luftëtarësh.
Të pandehurit kanë shpërthyer në akuza ndaj gjykatës.
Imami i vetëshpallur Bujar Hysa deklaroi se ‘zullumqarët do qeshin pak tani, por do qajnë në fund. Pas dhimbjes vjen lehtësimi.”
Ndërsa i pandehuri Fadil Muslimani u shpreh se në gjykatë komandon MOSSAD¬i. Seanca gjyqësore po zhvillohet me dyer të mbyllura, ndërsa të pranishëm në sallë janë edhe përfaqësues të Ambasadës Amerikane.
Gjykata e apelit do të vendosë sot për Imamët nëse do të lërë në fuqi dënimet e dhëna nga shkalla e parë apo të pranojë kërkesat e tyre për pafajësi.
Ndërkohë Prokuroria e Krimeve të Rënda po heton sërish këta të dënuar dhe për vazhdim të aktivitetit të tyre rekrutues nga qelitë e paraburgimit ku ata ndodhen. Burime nga krimet e rënda sqaruan për Report Tv se disa nga imamët e vetëshpallur kanë mbajtur lidhje me rrjetin e tyre jashtë duke komunikuar në biseda telefonike. Disa nga bisedat e përgjuara rezultojnë të kenë çuar dhe në arrestimet e 4 të dyshuarve 1 javë më parë në Shkodër të konsideruar si celula e ISIS dhe persona që po përgatisnin atentatin në stadiumin “Loro Boriçi” ku do të luhej ndeshja Shqipëri¬Izrael.
