Deputeti Ben Blushi, foli këtë mbrëmje në emisionin FAKT në Syri.net nga gazetari Çim Peka.
Ai ka thënë sërish se do të votonte kundër Edi Ramës, nëse do kishte një mocion në Parlament.
Gjithashtu ai ka thënë se Rilindja është një fatkeqësi, që s’po bën asgjë.
“Nëse nesër në Parlamentin e Shqipërisë ka një numër të mjaftueshëm deputetësh, të cilët mund të bëjnë një mocion për të rrëzuar kryeministrin, unë e votoj. Nuk bashkoj votat me askënd, por i shkoj qëllimit. Rilindja është një fatkeqësi, që s’po bën asgjë”, ka thënë më tej Blushi.
Më tej, kreu i “LIBRA” ka folur dhe për zgjedhjet e 2017 dhe mundësinë e një koalicioni. Blushi ka theksuar se për këtë do të vendosin vetëm anëtarët e partisë, duke shtuar se me Rilindjen mbase s’do jetë kurrë në koalicion.
“LIBRA” nuk është partia ime dhe s’ka për të qenë kurrë. Është partia e shumë njerëzve, që janë mbi 5 mijë. Ne po mundohemi t’iu japim mundësi këtyre njerëzve të kenë një zë në këtë qeveri. Ndaj dhe vendimi për t’u bërë pjesë e një koalicioni do jetë i këtyre dhe kurrë i imi. Unë do doja të ishim në koalicion vetëm, por ky nuk është vendimi im, do vendosin anëtarët. “LBRA” dhe Rilindja mbase nuk do jenë bashkë asnjëherë. Rilindja duhet të kërkojë ndjesë, të pastrohet”, ka shtuar Blushi.
