Nga BoldNews.al
Asgjë nuk është rastësi, në politikë ka një çmim dhe në vendin tonë ai është në kuptimin e drejtëpërdrejtë të tij, benefit që përkthehet në para të thata, apo dhurata të majme dhe prona të patundshme, por që për shkak të vesit të vjetër, tunden më kohë. Në daljen e fundit publike, ish-kryeministri socialist Fatos Nano, i bëri nderin e fundit Edi Ramës. Ai e veçoi nga të gjithë kryeministrat e tjerë dhe e “vlerësoi për vizionin që ka”.
Fakti që do të sulmonte ish-kryeministrin Berisha nuk është ndonjë risi, por Nano arriti kulmin kur të gjithë mëkatët politike në 30 vite pluralizëm në vend ia veshi Ilir Metës. Për Nanon ai është “djalli me shtatë mëkate”, ndërsa Rama engjelli që të jep shpresë. Deri në këtë pikë Nano e bëri detyrën e tij, duke e tradhtuar veten edhe me mënyrën e të folurit, që i përngjante një fjalimi të eminencës gri të Ramës, i cili me të drejtë ka marrë pseudonimim “fenomeni Fug(k)a”.
Nano është një figurë e harruar, e shtrydhur, pa asnjë ndikim, pa asnjë shpresë edhe në ëndrrat më të mira të tij për tu kthyer në protagonist. Megjithatë ai është gjallë, aktiv në jetën personale, shijues i së bukurës dhe peng i vesit. Prej me shumë se një dekadë jeton kryesisht në Vjenën e shtrenjtë. Në kryeqytetin e aristokracisë.
Po mbrëmë në intervistë, Nano u e tha hapur se ai vetë nuk ishte i korruptuar, gjithashtu edhe Ramën e lau në këtë pikë. Por një pikëpyetje ngrihet: Me çfarë të ardhurash e bën jetën e luksit ish-kryeministri Fatos Nano? Padyshim që ai merr një trajtim të veçantë si ish-kryeministër dhe ish-deputet, por nuk është më shumë se 800 euro.
Nga ana tjetër biznesi i bashkëshortes në bazë të regjistrave figuron se nuk ka fitime që të justifikojnë jetësën në Vjenë, udhëtimet e shtrenjta jashtë vendit, mbajtjen e dy vilave luksoze në Tiranë dhe mbi të gjitha një ves i kahershëm mes kazinosë dhe pijeve alkoolike.
Kryeministri i sotëm Edi Rama këtë e di mirë, ka tetë vite në pushtet dhe sado që ka probleme të theksuara në njohuritë ekonomike e ka të qartë se jetesa e shtrenjtë ka një kosto. Ish-miku dhe armiku i tij Fatos Nano sot ka nevojë, por më shumë se Nano, vetë Rama ka nevojë…
I ndodhur me një batak të bilancit të qeverisjes së tij, i mbytur në skandale të pafundme dhe aferash korruptive, i dalë zbuluar me lidhjet me botën e krimit, së fundmi deri në pastrimin e parave të mafies italiane me ndërtimin e kullave në Tiranë, Rama kërkon një mbështetje më shumë.
U gjet si gjithnjë në raste të tilla Fatos Nano. Ky i fundit është nuk është në tregun e politikës, por në “ruletën e jetës”, e cila ka shumë shpenzime… Rama është aty për të mbuluar gjithçka. Fundja e ka praktikë që në vitin 2005, ku posti i kreut socialist, duke zëvendësuar Nanon i kushtoi ca, por shpejt i rikuperoi. Tashmë nuk ka asnjë problem që të shpërblejë ish-mik-armikun e tij që në daljen e fundit publike i bëri nderin e radhës. Diskutimi është vetëm çështje shifrash. Jeta në Vjenë është e shtrenjtë dhe kur vendi me qeverisjen Rama është vënë i gjithi në “ruletën e fatit”, çfarëdo të jetë çmimi ai do të paguhet!
