Nga Boldnews.al
Ambasadorja amerikane në Tiranë, Yuri Kim, vlerësoi Prokurorinë Speciale (SPAK) gjatë ditës së Enjte, pas dënimit në shkallë të parë të një grupi personash, të përfshirë në atë që konsiderohet si dosja “339”.
Në një postim në rrjete sociale, diplomatja amerikane u shpreh: “SPAK hetoi me sukses një organizatë të madhe kriminale, duke cuar në burg 17 trafikantë droge dhe konfiskim të pasurive prej 5 milion €. Shpresojmë të shohim SPAK të japë më shumë rezultate kundër krimit të organizuar dhe korrupsionit”.
Ambasadorja Kim i referohet vendimit të Gjykata Kundër Korrupsionit dhe Krimit të Organizuar (GJKKO), e cila shpalli vendimin e fajësisë për disa persona për trafik narkotikësh, si edhe disa të tjerë për falsifikim dokumentash toke, mes të cilëve edhe familjarë të ish-deputetit socialist të Lezhës, Arben Ndoka.
Megjithë ekzaltimin publik, ambasadorja Yuri Kim shmangu disa detaje, për të cilat prokuroria speciale nuk duhet të jetë aq krenare.
Së pari, dosja “339” ishte në fazën e gjykimit kur u krijua SPAK-u, në fund të vitit 2019. Pra, qartësisht, Struktura e Posaçme Anti-Korrupsion nuk ka asnjë meritë për hetimin e dosjes “339”, pasi veprimet proceduriale janë kryer kur ajo nuk ekzistonte.
Së dyti, dosja “339”, e nisur gjatë zgjedhjeve të përgjithshme të vitit 2017, mbante në brendësi të saj edhe përgjimet e ish-kryebashkiakut të Durrësit, Vangjush Dako, me elementë të klanit kriminal “Avdylaj” të Shijakut, duke komunikuar për sigurimin e votave në favor të Partisë Socialiste.
Detaji i “Dakos” dhe të tjera episode të eksponentëve politikë në këtë dosje “u zhdukën” gjatë kohës që Prokuroria për Krime të Rënda drejtohej nga Donika Prela.
Dosja “339” kishte si pikë kulminante rolin e Vangjush Dakos, për të cilin qytetarët shqiptarë mësuan mjaftueshëm nga përgjimet e publikuara në gazetën gjermane “Bild”.
Me Dakon dhe të singjashmit e tij politikë jashtë përgjegjësisë penale, dosja “339” nuk ka asgjë për t’u ndjerë krenar.
Së treti, ambasadorja Kim vlerësoi SPAK-un për “konfiskim të pasurive prej 5 milion €”, duke lënë të kuptohet se këto pasuri janë pasuri të rrjedhura nga krimi i organizuar.
Në fakt, pjesa më e madhe e këtyre pasurive u përkasin disa prej të pandehurve në Lezhë, të cilët kanë privatizuar toka publike nëpërmjet dokumentave fallse.
Këto pasuri nuk janë produkt i krimit të organizuar, por janë siguruar nëpërmjet një vepre penale shumë më të lehtë, asaj të falsifikimit të dokumentave.
Dhe, në këtë rast, nuk bëhet fjalë për konfiskim në kuptim klasik të termit, por thjesht për rikthim të pronës në favor të shtetit.
Së katërti, vendimi i Gjykatës së shkallës së parë për Korrupsionin dhe Krimin e Organizuar nuk është i formës së prerë.
Më së paku, zërat publikë në Tiranë, përfshirë edhe ambasadorët e rëndësishëm, kanë detyrimin që të presin fjalën përfundimtare të gjykatës.
