“Lëvizja Për Universitetin” del kundër vendimit të rektoratit të Universitetit të Tiranës, që vendosi që provimet për simestrin e parë të bëhen online.
“Lëvizja Për Universitetin” kujton se “pas më shumë se thuajse një viti zhvillim online të mësimit, ku pjesa më e madhe e studentëve e kanë pasur të pamundur ose të vështirë qasjen në internet dhe aparaturat e nevojshme teknologjike, rektorati i UT ka marrë vendim që edhe provimet të zhvillohen në të njëjtën mënyrë”.
Sipas tyre, këto provime jo vetëm që vështirësojnë arritjen e rezultateve të merituara, por mbi të gjitha thellojnë diskriminimin ndaj studentëve në nevojë.
“E vetmja mënyrë për të shmangur diskriminimin ekonomik ndaj pjesës më të madhe të studentëve, mbetet zhvillimi i provimeve në klasa. Për shkak të situatës të pandemisë, qeverisë dhe universiteteve u lind detyrimi të sigurojnë infrastrukturën dhe të ndërmarrin me kujdes masat e nevojshme, ndërsa sezoni duhet të zgjatet në kohë në mënyrë që të shmangen grumbullimet. Ndryshe, ashtu siç po ndodh gjatë mësimit online, shumësia e studentëve nuk do kenë mundësi as të marrin pjesë në provime ose nuk do të jenë në kushte të përshtatshme për t’i zhvilluar ato. Me një vendim të tillë, rektorati i UT shfaq përsëri hendekun e thellë që ekziston mes burokracisë dhe studentëve, shqetësimet e të cilëve gjithnjë injorohen, ndërkohë që vazhdimisht kërcënohen nga fajdexhinjtë nëse nuk paguajnë haraçet në formën e tarifave studentore. Si gjithmonë, ‘të zgjedhurit’ në postet drejtuese i shërbejnë më shumë qeverisë sesa universitarëve”, thuhet në një reagim.
“Ne, të gjithë së bashku si studentë, duhet të këmbëngulim për anulimin e tarifave, rimbursimin për paketat e internetit dhe zhvillimin e provimeve në klasa. Universiteti nuk është treg dhe studentët nuk janë klientë”, mbyllet reagimi.
