Sot një gjykatë ruse po shqyrton kërkesën për ta mbajtur në burg deri në tri vite e gjysmë kritikun e Kremlinit Alexei Navalny, një çështje që ka shkaktuar protesta në të gjthë vendin dhe reagime nga perëndimi. Navalny, kritiku më i ashpër i Presidentit Vladimir Putin u arrestua me pretendimin se shkeli rregullat e një dënimi me kusht, në një rast që sipas opozitarit është i motivuar politikisht. Edhe sot autoritetet ruse penguan protestat afër ndërtesës ku po zhvillohet seanca kundër Navalny-t, duke arrestuar një numër të konsiderueshëm qytetarësh.
Udhëheqësi i opozitës ruse Alexei Navalny bëri kritika të ashpra nga Gjykata në Moskë ku po zhvillohet seanca, që mund të përfundojë me burgosjen e tij për disa vite.
Duke folur nga një kafaz qelqi në sallën e gjyqit, zoti Navalny e quajti arrestimin e tij si frikë dhe urrejtje të Presidentit Putin, duke thënë se udhëheqësi rus do të hyjë në histori si një helmues.
“Unë e kam ofenduar atë duke i mbijetuar atentatit që ai urdhëroi”, tha Navalny gjatë seancës.
“Qëllimi I kësaj seance është trembja e një numri të madh njerëzish. Ju nuk mund të burgosni miliona njerëz. Nuk mund të burgosni gjithë vendin”, tha ai
44 vjeçari u arrestua më 17 janar pas kthimit nga Gjermania, ku kaloi rreth pesë muaj, për t’u shëruar pas helmimit me një agjent nervor, për të cilin ai fajëson Kremlinin.
Autoritetet ruse i mohojnë akuzat, duke thënë se nuk ka prova të helmimit.
Shërbimi i burgjeve të Rusisë kërkon që Navalny ta vuajë dënimin e vitit 2014 prej tre vite e gjysmë në burg, pasi ai shkeli lirimin me kusht.
Alexei Navalny theksoi se Gjykata Evropiane për të Drejtat e Njeriut vendosi se dënimi i tij i vitit 2014 ishte i jashtëligjshëm dhe se Rusia i pagoi atij kompensim në përputhje me vendimin.
Ai dhe avokatët e tij thanë se ndërsa ai po shërohej në Gjermani nga helmimi, nuk kishte si të regjistrohej personalisht tek autoritetet ruse siç kërkon ligji.
“U ktheva në Moskë pasi përfundova trajtimin. Çfarë tjetër mund të bëja”, tha Navalny të martën.
“Po luftoj dhe do të vazhdoj edhe pse jam në duart e njerëzve që pëlqejnë shpërndarjen e armëve kimike gjithandej dhe të cilët nuk mërziten për jetën time”, shton ai.
Burgosja e Navalnit nxiti protesta të mëdha në gjithë Rusinë.
“E burgosën në kundërshtim me ligjin, për arsye politike. Gjithçka është e qartë. Ata që kanë sy mund ta shohin”, thotë Serbey, protestues.
Por jo të gjithë besojnë në pafajësinë e Alexei Navalnyt.
“Nuk e respektoj Navalnyn, për mënyrën se si e helmoi veten. Mendoj se gjithçka duhet bërë me mënyra të civilizuara”, thotë Yelena, një qytetare e Moskës që mendon ndryshe.
Grupet e pavarura të monitorimit njoftojnë se më shumë se 120 persona u arrestuan të martën pranë ndërtesës ku po zhvillohej seanca.
Marina Litvinenko, e veja e ish agjentit rus Alexandër Litvenko i cili u vra me helm radioaktiv më 2006, tha se administrata ruse po frikësohet nga zgjerimi i protestave.
“Administrata ruse është në panik, ata mund ta ndalnin përshkallëzimin në ditën kur Alexei Navalny erdhi, duke injoruar atë. Mendoj se ashtu nuk do të kishte protesta. Por ata po frikësoheshin. Nuk dinë si të veprojnë ndërsa shohin më shumë njerëz që vendosin të dalin në rrugë”, tha ajo.
Vetëm dy ditë më parë policia arrestoi më shumë se 5 mijë e 750 protestues.
Vendet perëndimore kërkuan lirimin e menjëhershëm të Navalnit dhe të arrestuarve tjerë. gjatë demonstratave.
Autoritetet ruse akuzojnë perëndimin se po ndërhyn në punët e brendshme të Rusisë.
