Nga Boldnews.al
Mbrëmjen e djeshme mbërritën në Shqipëri 1100 vaksina nga Pfizer, të cilat u pritën në një ceremoni shtetërore, shumë më ndryshe nga mënyra se si mbërritën ato 975 vaksinat e para, që na u dhuruan nga një vend, që kishte kërkuar të mos përmendej.
Pra në total, deri më 1 shkurt në Shqipëri kanë mbërritur rreth 2 mijë vaksina, ndonëse duhej të kishin mbërritur mbi 10 mijë të tilla dhe deri në fund të shkurtit shifrat do ishin diku te 42 mijë doza.
Përtej kësaj, sot nisi faza e dytë e vaksinimit për ata qe kane marrë dozën e parë, mes të cilëve ishte edhe krye-epidemiologu, gjenerali i luftës me armikun e padukshëm, babai i Kombit, lideri botëror, Edi Rama.
Vaksinimi edhe i dozës së dytë nisi pikërisht në stadium, atje ku vijoi seria e dytë e show propagandistik. Edi Rama u shfaq i pari, i shoqëruar nga një staf, dhe truprojat qe u kujdesën të qëndrojnë pas disa stendave, të vendosura për fushatën e vaksinimit.
Pastaj ishte shpura e fotografëve dhe kameramanëve, që duhej të fiksonin momentin e shpimit të liderit botëror. Pak me tutje, në një nga vendet e përcaktuara si bokse vaksinash, ndodhej dr. Najada Ccomo, e cila ishte në pritje që të përfundonte njëherë Rama dozën e dytë dhe më pas procesi të vijonte me të.
Gjithçka ishte e koordinuar me një regji, të ngjashme me atë që përdor Kim Jong-un, me një ndryshim që lideri ynë global është më i gjatë dhe pak më i shkujdesur. Rama u pyet nëse kishte pasur shqetësime nga doza e parë, u përgjigj prerë “jo”, ndërsa gjithçka transmetohej live, deri në momentin që Kryeministri u largua nga mjediset sportive.
Tashmë ai është i vaksinuari i parë shqiptar me dy dozat e vaksinës, madje nëse do të mbahen evidenca emri i tij do të shkruhet në krye të listës. Madje ia ka kaluar edhe mikut të tij, Presidentit serb, Aleksandar Vuçiç, vendi i të cilit pavarësisht se ka siguruar shumë fish më tepër vaksina se ne, ende nuk është vaksinuar me dozën e parë.
Sot është një ditë e shënuar, pasi “lypsi”, sikundër e quajti veten javë më parë, mori dozën e dytë, mes atyre 1100 dozave që erdhën dhe në prani të dhjetëra kamerave dhe aparateve fotografike. Të lumtur duhet të jenë edhe ata mjekë e infermierë, që mund të mos e merrnin sot dozën e dytë, nëse Rama nuk do të shkonte ne stadium.
