Mbrëmja që sapo kaluam, ka qenë mjaft e veçantë për Nard Ndokën. Në “DWM” erdhi bashkëshortja e tij, Kozeta, e cila, edhe pse fillimisht e kishte “refuzuar” ftesën, pranoi të ishte bashkë me të për të ruajtur një kujtim të bukur, një “dance” deri në fund të jetës.
Pasi vizituan fillimisht shtëpinë e Nardit, të mbushur plot me nipër e mbesa, produksioni i DWM kishin bërë një “marrëveshje” të fshehtë me Kozetën, bashkëshorten e Nardit.
Pasi mbaroi kërcimin me Gretën, Alketa e ngacmoi Nardin pikërisht për Kozetën dhe për familjen, e cila gjatë viteve të politikës, i është dashur të sakrifikojë më shumë se të gjithë për pozicionin e tij të vështirë: Kam një familje të mrekullueshme për fatin e mirë. Bashkëshortja është short.
Kozeta është short për mua. Ne jemi njohur që fëmijë, jemi rritur bashkë. Unë e vlerësoj për durimin që ka pasur për politikën. Është e vështirë.
Dhe menjëherë pas kësaj, Alketa i kërkoi Nardit të premtonte se, nëse një ditë Kozeta do të pranonte të ishte pjesë e spektaklit, ai do ta puthte në skenë. Nardi pranoi, por nuk e dinte se ajo ishte në prapaskenë dhe erdhi vetëm pas një telefonate.
Pasi kërcyen bashkë “Dance me to the end of love” me një elegancë të pashoqe, Nardi dhe Kozeta emocionuan të gjithë publikun. Pas kërcimit, Alketa e pyeti se sa e vështirë është të jetojë me një politikan.
“Nuk është aspak e vështirë, unë e kam mbështetur gjithë jetën dhe do ta mbështes”, tha Kozeta duke pranuar se dashuria e vërtetë është pa kushte… deri në fund të jetës. Pas kësaj, jo vetëm Nardi, por i gjithë publiku e pati të vështirë t’i përmbajë lotët. /Revista Class/
